लातूर, दि.25 डिसेंबर – वलांडी परिसरात देशीदारू वाहतूक करताना स्थानिक गुन्हे शाखेच्या पथकाकडून कारवाई करण्यात आली असून यात देशीदारू, वाहनासह 4 लाख 7 हजार रुपयाचा मुद्देमाल जप्त करण्यात आला आहे.
पोलीस अधीक्षक सोमय मुंडे यांनी लातूर जिल्ह्यातील अवैधरीत्या चालणारे धंदे, बेकायदेशीर दारू विकणारे यांचेवर कारवाई करण्याबाबत आदेशित केले होते. त्या अनुषंगाने जिल्ह्यात अवैध धंद्याविरुद्ध विशेष मोहीम सुरु आहे. पोलीस अधीक्षक सोमय मुंडे, अपर पोलीस अधीक्षक डॉ.अजय देवरे, उपविभागीय पोलीस अधिकारी, निलंगा डॉ. दिनेश कोल्हे यांचे मार्गदर्शनाखाली स्थानिक गुन्हे शाखेचे पोलीस निरीक्षक गजानन भातलवंडे यांचे नेतृत्वात अवैध धंद्याविरुद्ध कार्यवाही करण्याकरिता विविध पथके तयार करण्यात आले होते.
या पथकाकडून 24 डिसेंबर रोजी पथकास मिळालेल्या गोपनीय माहितीच्या आधारे पोलिस ठाणे देवणी हद्दीत विनापरवाना देशीदारूची अवैध विक्री/व्यवसाय करण्यासाठी वलांडी शिवारातून टाटा सुमो वाहना मधून देशीदारूची वाहतूक होत असल्याची माहीती मिळाली. या पथकाने सापळा लावून छापा मारला असता तेथे देशीदारूचे 1536 बाटल्या याची अंदाजे किंमत 1 लाख 7 हजार 520 रूपयेची बेकायदेशररित्या देशी दारू, एक टाटा सुमो वाहन असा एकूण 4 लाख 7 हजार 520 रुपयेचा देशीदारूचा मुद्देमाल बेकायदेशीररित्या वाहतूक करीत असताना मिळून आला.या प्रकरणी पांडुरंग शिवाजी बिराजदार, वय 40 वर्ष, राहणार इस्लामवाडी, तालुका देवनी याचे विरुद्ध पोलीस ठाणे देवणी येथे गुन्हा दाखल करण्यात आला आहे. या गुन्ह्याचा तपास देवणी पोलीस करत आहेत. ही कारवाई वरिष्ठाचे मार्गदर्शनात स्थानिक गुन्हे शाखेचे पोलीस निरीक्षक गजानन भातलवंडे यांचे नेतृत्वात, पोलीस अंमलदार सचिन मुंडे, बालाजी जाधव, रवि कानगुले यांनी केली आहे.
