येथील वांद्रे-वरळी सी लिंकवरील टोल नाक्यावर गुरुवारी रात्री भीषण अपघात झाला. त्यात टोल नाक्यावर उभ्या असलेल्या सहा ते सात वाहनांना मागून आलेल्या भरधाव कारने जोरदार धडक दिली. या दुर्घटनेत तिघांचा जागीच मृत्यू झाला असून सहा ते सात जण गंभीर जखमी झाले आहेत. मृतांमध्ये दोन महिलांचा समावेश आहे. या भीषण अपघाताचा व्हिडीओ देखील समोर आला आहे.
मिळालेल्या माहितीनुसार, गुरुवारी रात्री १० वाजेच्या सुमारास सी लिंकवरील टोल प्लाझाच्या अवघ्या १०० मीटर आधी हा अपघात झाला. एका इनोव्हा गाडीने मर्सिडीज कारला धडक दिली. त्यानंतर पळून जात असताना टोल नाक्यावर थांबलेल्या वाहनांना इनोव्हा कारने उडवले. या अपघातात इनोव्हा गाडीतील तिघांचा मृत्यू झाला आहे. यात चालक देखील जखमी झाला असून चालकासह अन्य चौघांवर भाभा रुग्णालयात उपचार सुरू आहेत. तर एकाला लिलावती रुग्णालयात हलवण्यात आले आहे. अपघातात हनिफ पिर, हमाबीबी पिर, खतीजा हटिया या तिघांचा मृत्यू झाला आहे. तर असीम सदर, हजरा सदर, बीबी सदर, राजश्री दवे, राकेश दवे, अशी जखमींची नावे आहेत. दरम्यान वांद्रे पोलीस ठाण्यात या प्रकरणी गुन्हा नोंदवण्यात आला आहे. तर चालकाला डिस्चार्ज मिळाल्यानंतर अटक केली जाणार आहे. अपघातानंतर सी लिंकवर मोठी वाहतूक कोंडी झाली होती.
अपघाताची माहिती मिळताच पोलिसांनी घटनास्थळी धाव घेत जखमींना उपचारासाठी रुग्णालयात दाखल केले. पोलिसांनी दिलेल्या माहितीनुसार, वरळीहून वांद्र्याच्या दिशेने भरधाव वेगात आलेली एक इनोव्हा कारने सी लिंकवरून जात असलेल्या कारला धडक दिली. अपघातानंतर इनोव्हा कारच्या चालकाने कार दामटवली. वेग जास्त असल्याने इनोव्हा कारने टोलनाक्यावर उभ्या असलेल्या सुमारे सहा वाहनांना धडक दिली. या भीषण अपघातात तिघांचा जागीच मृत्यू झाला. तर सहा ते सात जण जखमी झाले. तीन जणांची प्रकृती गंभीर आहे. जखमींमध्ये इनोव्हा कारच्या चालकाचा देखील समावेश आहे.
गेल्या वर्षीही ऐन दिवाळीच्या तोंडावर वांद्रे-वरळी सी लिंकवर अपघाताची घटना घडली होती. एका मागून एक गाड्या एकमेकांवर आदळल्याने भीषण अपघात झाला होता. या भीषण अपघतात ५ जणांचा मृत्यू झाला होता. याशिवाय १२ जण जखमी झाले होते.
