World Cup 2023: २०२३ च्या विश्वचषक स्पर्धेत भारताने बांगलादेशवर मोठा विजय मिळवला. संघाचा अष्टपैलू खेळाडू हार्दिक पंड्या या सामन्यादरम्यान जखमी झाला. या सामन्यानंतर कर्णधार रोहित शर्माने त्याच्या फिटनेसबाबत माहिती दिली.
विश्वचषक २०२३ मध्ये भारताने आणखी एक सोपा विजय मिळवला आहे. महाराष्ट्र क्रिकेट असोसिएशन स्टेडियमवर झालेल्या या सामन्यात भारताने ७ गडी राखून विजय मिळवला. गोलंदाजांच्या अप्रतिम कामगिरीनंतर विराट कोहलीने भारताकडून शतक झळकावले. शुभमन गिलनेही अर्धशतक झळकावले. भारताचा अष्टपैलू खेळाडू हार्दिक पंड्या या सामन्यादरम्यान जखमी झाला होता. सामन्यानंतर कर्णधार रोहित शर्माने त्याच्या दुखापतीबाबत माहिती दिली.
बांगलादेशच्या पहिल्या डावात हार्दिक पांड्याच्या दुखापतीने सर्वांनाच मोठा धक्का दिला. हार्दिक पांड्या संघासाठी एक उत्तम अष्टपैलू खेळाडू असल्याची भूमिका चांगली निभावत आहे त्यामुळे त्याची दुखापत ही संघासाठी मोठा सेटबॅक ठरू शकते. बांगलादेशविरुद्ध चेंडू रोखण्याच्या प्रयत्नात हार्दिक पांड्याचा पाय मुरगळला. यानंतर तो वेदनेमध्ये असून तो बाहेर गेला. मग हार्दिकने पुन्हा सामन्यात भाग घेतला नाही. हार्दिक अचानक माडं सोडून गेल्याने त्याचे षटक अपूर्ण राहिले. मग रोहित आणि विराट कोहली एकमेकांशी बोलताना दिसले आणि त्यानंतर मग विराट कोहलीला उर्वरित ३ चेंडू टाकण्याची जबाबदारी दिली गेली. विराटने ६ वर्षानंतर गोलंदाजी केली. याचसोबाबत विराटच्या चाहत्यांसाठी हा क्षण एक पर्वणी ठरला.
पण त्याचसोबत हार्दिकची दुखापत सगळ्यांसाठी चिंतेचा विषय ठरत होती. पण भारताच्या डावात हार्दिकला ड्रेसिंग रूममध्ये पाहून सगळं काही आलबेल असावं असं वाटत होतं. सामन्यानंतर त्याच्या फिटनेसबद्दल रोहित शर्मा म्हणाला की काळजी करण्यासारखे काही नाही. रोहित म्हणाला, ‘हार्दिकला थोडा त्रास झाला, पण काळजी करण्यासारखी मोठी गोष्ट नाही. उद्या सकाळी तो कसा आहे ते आपण पाहू आणि मग पुढे कसे जायचे याचे नियोजन करू.’
क्षेत्ररक्षणाचे कौतुक
बांगलादेशवरील विजयावर कर्णधार रोहित म्हणाला – हा एक चांगला विजय होता, ज्याची आम्ही आतुरतेने वाट पाहत होतो. आमची सुरुवात चांगली झाली नाही पण मधल्या षटकांमध्ये आणि शेवटी आम्ही पुनरागमन केले. या सर्व सामन्यांमध्ये आमचे क्षेत्ररक्षण अप्रतिम होते, हे तुमच्या नियंत्रणात आहे, तुम्ही इथे सर्वोत्तम प्रयत्न करू शकता. कोणत्या लेंग्थवर गोलंदाजी करायची हे गोलंदाजांना माहीत होते. जड्डू चेंडू आणि झेल टिपण्यात उत्कृष्ट होता. पण तुम्ही शतकाला मात देऊ शकत नाही.
ड्रेसिंग रूममध्ये पुरस्कार का दिला जातो?
भारतीय संघाच्या ड्रेसिंग रूममध्ये पुरस्कार देणे सुरू झाले आहे. प्रत्येक सामन्यानंतर सर्वोत्तम क्षेत्ररक्षकाला ड्रेसिंग रूममध्ये पदक मिळते. याबद्दल रोहित शर्मा म्हणाला- आम्ही एक संघ म्हणून चांगली कामगिरी करत आहोत, खेळाच्या मैदानावरील सर्व कामगिरीसाठी एक पदक आहे आणि ही अशी गोष्ट आहे जी प्रत्येकाला चांगली कामगिरी करण्यास प्रवृत्त करते.
