नवी दिल्ली, 26 जून (हिं.स.) : दिल्लीतील दारू घोटाळ्याशी संबंधित भ्रष्टाचार प्रकरणात अरविंद केजरीवाल यांना मोठा झटका बसला आहे. राऊस एव्हेन्यू कोर्टाने आज, बुधवारी केजरीवाल यांना 3 दिवसांची सीबीआय कोठडी ठोठावली आहे. अवकाशकालिन विशेष न्यायाधीर अमिताभ रावत यांच्या न्यायालयाने ही कोठडी सुनावली आहे.
यासंदर्भातील निर्णयात न्यायालयाने सांगितले की, सीबीआयच्या अर्जाला 3 दिवसांची परवानगी आहे. केजरीवाल यांना बुधवारी कडेकोट बंदोबस्तात तिहार तुरुंगातून न्यायालयात हजर करण्यात आले. यानंतर सीबीआयने त्याला अटक करण्यासाठी अर्ज दाखल केला. हे न्यायालयाने मान्य केले. या प्रकरणात आपण निर्दोष असल्याचा दावा केजरीवाल यांनी न्यायालयासमोर केला.सुनावणीदरम्यान केजरीवाल यांनी न्यायालयाला सांगितले की, मी संपूर्ण दोष मनीष सिसोदिया यांच्यावर टाकल्याचे सीबीआयच्या सूत्रांच्या हवाल्याने मीडियामध्ये दाखवले जात आहे. सिसोदिया दोषी आहेत की अन्य कोणी दोषी आहे, असे कोणतेही विधान मी केलेले नाही. सिसोदिया आणि आम आदमी पक्षासोबत मीही निर्दोष असल्याचे मी म्हटले आहे. सीबीआय हे प्रकरण खळबळ माजवत असल्याचा आरोपही केजरीवाल यांनी केला. त्यावर न्यायालयाने म्हटले की, मीडिया कोणत्याही मथळ्याला महत्त्व देते. या प्रकरणात प्रसिद्धी माध्यमांना नियंत्रित करणे खूप कठीण आहे.
सीबीआयने केजरीवाल यांच्या कोठडीची मागणी करणाऱ्या अर्जात म्हटले आहे की, या प्रकरणातील कट उघड करण्यासाठी अरविंद केजरीवाल यांची चौकशी करणे आवश्यक आहे. या प्रकरणात केजरीवाल यांना पुरावे आणि प्रकरणातील अन्य आरोपींना सामोरे जाण्याची गरज आहे.सुनावणीदरम्यान केजरीवाल यांना आता अटक का केली जात आहे, असा सवालही न्यायालयाने सीबीआयला विचारला. यावर सीबीआयच्या वकिलाने सांगितले की, एजन्सीने निवडणुकीच्या वेळी असे करणे टाळले. केजरीवाल यांच्या अंतरिम जामिनावरील खटलाही न्यायालयात प्रलंबित होता. निवडणुकीदरम्यान एजन्सीचा संयम दाखवत प्रचारात व्यस्त असताना केजरीवाल यांना अटक केली नाही. तत्पूर्वी, विशेष न्यायालयाने 20 जून रोजी दिलेल्या जामीन आदेशावर दिल्ली उच्च न्यायालयाच्या 21 जूनच्या अंतरिम स्थगिती आदेशाला आव्हान देणारी याचिका केजरीवाल यांनी बुधवारी सर्वोच्च न्यायालयातून मागे घेतली.
