सोलापूर – महानगरपालिका निवडणुकीत भारतीय जनता पार्टीने ऐतिहासिक आणि भरघोस यश मिळवत स्पष्ट बहुमताची मजल मारली आहे. या विजयामुळे महापालिकेत सत्ता स्थापनेच्या दिशेने भाजपाने वेगाने हालचाली सुरू केल्या असून, त्यातील अत्यंत महत्त्वाचा टप्पा म्हणजे गट नोंदणी प्रक्रिया. त्या अनुषंगाने भाजपाचे नवनिर्वाचित तब्बल ८७ नगरसेवक आज पहाटे पुणे विभागीय आयुक्त कार्यालयाकडे रवाना झाले.
महानगरपालिकेत अधिकृत गट नोंदणी करणे हे सत्ता स्थापनेसाठी अनिवार्य असते. नियमानुसार सर्व नवनिर्वाचित नगरसेवकांनी प्रत्यक्ष उपस्थित राहून गट नोंदणी करणे आवश्यक असल्याने भाजपाने यासाठी विशेष नियोजन केले होते. पालकमंत्री जयकुमार गोरे आणि भाजप शहराध्यक्ष रोहिणी तडवळकर यांच्या मार्गदर्शनाखाली नगरसेवकांचा हा ताफा आज पहाटे सोलापूरहून पुण्याकडे मार्गस्थ झाला.
या प्रवासासाठी विशेष लक्झरी बसची व्यवस्था करण्यात आली होती, तर काही नगरसेवक आपल्या खासगी वाहनांनी पुण्याकडे रवाना झाले. संपूर्ण प्रवासात शिस्तबद्ध आणि नियोजनबद्ध पद्धतीने हालचाल करण्यात आली. दुपारी पुणे विभागीय आयुक्त कार्यालयात सर्व नगरसेवकांच्या उपस्थितीत भारतीय जनता पार्टीच्या अधिकृत गटाची नोंदणी प्रक्रिया पार पडणार आहे. गट नोंदणी पूर्ण होताच महापौर, उपमहापौर आणि स्थायी समितीच्या निवडींची प्रक्रिया सुरू होणार असून, सोलापूर महापालिकेतील सत्तास्थापनेचा मार्ग आता अधिकृतपणे मोकळा झाला आहे. यावेळी भाजपचे सर्व नूतन नगरसेवक तसेच पदाधिकारी कार्यकर्ते उपस्थित होते.
शहराच्या विकासासाठी स्थिर आणि सक्षम नेतृत्व
भाजपाला मिळालेल्या या घवघवीत यशामुळे सोलापूर शहराच्या विकासासाठी स्थिर आणि सक्षम नेतृत्व मिळणार असल्याचा विश्वास व्यक्त केला जात आहे. आगामी काळात महापालिकेत भाजपाच्या नेतृत्वाखाली विकासाभिमुख निर्णय, पारदर्शक प्रशासन आणि नागरिकाभिमुख धोरणे राबवली जातील, असा दावा पक्षाचे अध्यक्षा रोहिणी तडवळकर यांनी व्यक्त केला आहे.
