लातूर : लातूर पोलिसांच्या स्थानिक गुन्हे शाखेने जिल्हाभरात मागच्या तीन महिन्यांपासून ज्वेलर्स दुकाने, बँक तसेच अनेक घरफोड्या करणाऱ्या सराईत आरोपींच्या टोळीचा पर्दाफाश केला असून या टोळीकडून १३ किलो ७०० ग्राम चांदीसह सोन्याचे दागिने असा एकूण तब्बल २४ लाख १७ हजार ९०० रुपयांचा मुद्देमाल जप्त करण्यात आला आहे. या टोळीतील एका आरोपी पोलिसांच्या जाळ्यात सापडला असून टोळीतील आणखी चार आरोपी फरार आहेत.
स्थानिक गुन्हे शाखेचे पोलीस निरीक्षक सुधाकर बावकर यांनी आपल्या पथकाकडून खात्रीशीर माहिती मिळवून लातूरच्या नवीन रेणापुर नाका परिसरात सापळा लावून रविवारी दुपारी दोनच्या सुमारास संशयास्पदरीत्या रोडवर उभा असलेल्या रोशनसिंग बबलुसिंग टाक (वय 20 वर्षे), रा. संजयनगर, देऊळगावराजा, जि. बुलढाणा यास ताब्यात घेऊन त्याची झडती घेतली असता त्याच्या ताब्यातील पोत्यामध्ये मोठ्या प्रमाणात चांदीचे दागिने, चैन, करदोरे तसेच सोन्याचे दागिने आढळून आले.
चौकशीदरम्यान रोशनसिंग टाक याने त्याच्यासोबतच्या आणखी चार फरार साथीदारांसह अहमदपूर सराफ लाईनमधील अमित ज्वेलर्स व विठ्ठल ज्वेलर्स,) काजळी हिप्परगा येथील बँक ऑफ महाराष्ट्र शाखेत, अहमदपूर मधील एका घरात तसेच निलंगा तालुक्यातील मदनसुरी येथील विश्वकर्मा ज्वेलर्स व परशुराम पार्क, लातूर येथील एका घरात असे एकूण पाच ठिकाणी चोऱ्या केल्याचे कबूल केले आहे.
आरोपी रोशनसिंग बबलुसिंग टाक यास जप्त केलेल्या मुद्देमालासह पोलीस ठाणे अहमदपूर येथे दाखल असलेल्या गुन्ह्यात पुढील तपास कामी ताब्यात देण्यात आले आहे.
इतर आरोपींचा शोध सुरू असून लवकरच त्यांनाही अटक करण्यात येणार आहे. पोलीस अधीक्षक अमोल तांबे, अपर पोलीस अधीक्षक मंगेश चव्हाण यांचे मार्गदर्शनात स्थानिक गुन्हे शाखेचे पोलीस निरीक्षक सुधाकर बावकर यांच्या नेतृत्वातील पथकामधील सपोनि सदानंद, भुजबळ, अमितकुमार पुणेकर, पोउपनि राजाभाऊ घाडगे, प्रमोद देशमुख पोलीस अमलदार माधव बिलापटटे, नवनाथ हासबे, रामलिंग शिंदे, तुराब पठाण, मोहन सुरवसे, राजेश कंचे, युवराज गिरी, गणेश साठे, शैलेश सुडे, श्रीनिवास जांभळे, सुहास जाधव, धनंजय गुट्टे, प्रज्वल कलमे, महिला पोलीस अंमलदार अंजली गायकवाड यांनी पार पाडली.
