ठाणे : देशातील चौथ्या क्रमांकाची बहुराज्जीय सहकारी बँक असलेल्या टीजेएसबी सहकारी बँक लिमिटेडने दिनांक ३१ मार्च २०२६ रोजी समाप्त झालेल्या आर्थिक वर्षासाठी आपले लेखापरीक्षित आर्थिक निकाल जाहीर केले आहेत. मागील १५ वर्षांप्रमाणे यंदाही दिनांक १० एप्रिल रोजी लेखा परिक्षित निकाल जाहीर करण्याची परंपरा बँकेने कायम ठेवली आहे.
एक महत्त्वपूर्ण टप्पा गाठत बँकेने आपल्या ५४व्या वर्षात एकूण व्यवसायाचे ₹२५,००० कोटींचे उद्दिष्ट पार केले आहे. तसेच, राजस्थान आणि छत्तीसगड या दोन नवीन राज्यांमध्ये विस्तार करून बहुराज्जीय सहकारी बँक म्हणून आपली स्थिती अधिक भक्कम केली आहे. वर्षभरात नवीन शाखा सुरू करणे आणि धोरणात्मक विलीनीकरणांमुळे बँकेच्या एकूण शाखांची संख्या आता १६५ झालेली आहे.
आर्थिक वर्ष २०२५-२६ मध्ये बँकेचा एकूण व्यवसाय ₹२५,३६० कोटी इतका नोंदविण्यात आला असून, यात ११६, २४४ कोटी ठेवी आणि १९,११६ कोटी कर्ज वाटपाचा समावेश आहे. बँकेने ₹२८७ कोटींचा एकूण नफा तर ५१५५ कोटींचा निव्वळ नफा नोंदविला आहे.
बँकेची एकूण अनुत्पादित कर्जे ३.११% तर निव्वळ अनुत्पादित कर्जे ०% इतकी आहेत, हे बँकेच्या शिस्तबद्ध कर्ज व्यवस्थापन आणि प्रभावी वसूली व्यवस्थेचे यश आहे.
पत्रकार परिषदेत अध्यक्ष श्री. शरद गांगल म्हणाले, ₹२५,००० कोटींच्या एकूण व्यवसाय टप्पा ओलांडणे हे टीजेएसबी बँकेसाठी अभिमानास्पद आहे. बँकेची ही प्रगती ग्राहकांच्या विश्वासासह योजनाबद्ध विस्ताराच्या धोरणाचे द्योतक आहे. आम्ही शाश्वत वाढ आणि पारदर्शी, कार्यक्षम प्रशासकीय कामकाजासाठी कटिबद्ध आहोत; असेही अध्यक्ष श्री. शरद गांगल यांनी सांगितले.
उपाध्यक्ष सीए श्री. वैभव सिंगवी म्हणाले, या वर्षातील आमची आर्थिक कामगिरी सातत्य आणि संतुलन दर्शविते. भक्कम भांडवली पर्याप्तता आणि स्थिर मालमत्ता गुणवत्ता याच्या आधारे हे साध्य झाले आहे. व्यावसायिक जोखीम व्यवस्थापनाची शिस्त पाळली आहे. बँकेच्या कार्यपद्धतीमुळे ग्राहकांचा विश्वास टिकवून तो वृद्धिंगत केला आहे.
व्यवस्थापकीय संचालक आणि मुख्य कार्यकारी अधिकारी श्री. निखिल आरेकर यांनी सांगितले, “या वर्षी बँकेने ₹२५,००० कोटींच्या एकूण व्यवसायाचा आकडा पार करून एक महत्त्वपूर्ण व्यवसायिक टप्पा गाठला आहे. यातून आमच्या सातत्यपूर्ण प्रगतीचे आणि सशक्त वाटचालीचे दर्शन घडते. राजस्थान आणि छत्तीसगडमध्ये या दोन राज्यात प्रवेश, नवीन शाखांतुन विस्तार आणि सिटीझन को-ऑपरेटिव्ह बँक लिमिटेड, गोवा आणि सावंतवाडी अर्बन को-ऑपरेटिव्ह बँक लिमिटेड या दोन बँकांचे विलिनीकरण यातून बँकेचा विकासाचा आणि विस्ताराचा दृष्टिकोन प्रतिबिंबित होतो.
आर्थिक वर्षातील प्रमुख कामगिरी
* फेब्रुवारी २०२५ मध्ये सिटीझन को-ऑपरेटिव्ह बँक लिमिटेड, गोवा आणि मे २०२५ मध्ये सावंतवाडी अर्बन को-ऑपरेटिव्ह बँक लिमिटेड यांचे विलीनीकरण
* विलीनीकरणानंतर अवघ्या एका वर्षात नवीन समाविष्ट शाखा नफ्यात येण्यास सुरुवात झाली, ज्यामुळे कोकण आणि गोवा विभागातील बँकेची स्थिती अधिक सक्षम झाली आहे.
* सहकारी क्षेत्रातील पहिली बँक म्हणून “bank.in” या बँकिंग डोमेनवर संकेतस्थळ यशस्वीपणे स्थलांतरित केले
* देशातील पहिली UPI-ICD (आंतरकार्यक्षम रोख ठेवी) स्वीकारणारी बँक म्हणून कार्यान्वित
* राजस्थान आणि छत्तीसगड या दोन नवीन राज्यांमध्ये प्रवेश
* ७ नवीन शाखांची वाढ; एकूण शाखा संख्या १६५
* ₹२५,००० कोटी एकूण व्यवसायाचा टप्पा पूर्ण केला
टीजेएसबी सहकारी बँक लिमिटेड विषयी
१९७२ मध्ये स्थापन झालेली टीजेएसबी सहकारी बँक लिमिटेड ही महाराष्ट्र, गुजरात, गोवा, कर्नाटक, मध्य प्रदेश, छत्तीसगड आणि राजस्थान या सात राज्यांमध्ये समर्थपणे कार्यरत असलेली अग्रगण्य बहुराज्जीय बँक आहे. ग्राहककेंद्रित सेवा, पारदर्शक आर्थिक सेवा आणि आर्थिक सक्षमीकरणासाठी सातत्यपूर्ण प्रयत्न यासाठी बँक ओळखली जाते.
बँकेच्या सक्षम आणि व्यापक वितरण व्यवस्थे मुळे तसेच third party आर्थिक उत्पादने व सेवा ग्राहकांना विक्री करण्यातील अनुभवामुळे, विमा सेवा सर्वस्तरात उपलब्ध करून देण्यासाठी बँक प्रभावी माध्यम ठरली आहे.
पाच दशकांहून अधिक कालावधीतील सेवा कुशलतेने बँक देशभर क्रमाक्रमाने विस्तार करताना अत्याधुनिक तंत्रज्ञान आधारित सेवा विस्तार, ग्राहक हितासाठी सुरक्षेला प्राधान्य आणि आणि कार्यक्षमतेत अचूकता यावर विशेष लक्ष देत आहे.
