सोलापूर : शहरातील पाथरूट चौक परिसरात महापालिकेच्या 24 आसनी सार्वजनिक शौचालयाचे बेकायदेशीररित्या पाडकाम करून त्या जागेवर उभारलेले 15 अनधिकृत पत्र्याचे शेड आज जेसीबीच्या साहाय्याने जमीनदोस्त करण्यात आले. महापालिका अतिक्रमण प्रतिबंधक विभागाने आज ही कारवाई केली.
शहरातील पाथरूट चौक परिसरात महापालिकेच्या 24 आसनी सार्वजनिक शौचालयाचे बेकायदेशीररित्या पाडकाम करून त्या जागेवर अनधिकृत 25 पत्र्याचे शेड उभारण्यात आले होते. या अतिक्रमणामुळे येथील जागेचा गैरवापर होत असल्याचा आरोप नागरिकांकडून होत होता. येथील नागरिकांकडून तक्रारीही आल्या होत्या.
दरम्यान, नागरिकांच्या तक्रारीची दखल घेऊन महापालिका अतिक्रमण प्रतिबंधक विभागाच्या वतीने या ठिकाणी आज सकाळी मोठी कारवाई केली. महापालिका आयुक्त डॉ. सचिन ओम्बासे यांच्या आदेशानुसार उपअभियंता तपन डंके यांच्या नियंत्रणाखाली अतिक्रमण प्रतिबंधक विभाग प्रमुख जगन्नाथ बनसोडे यांच्या मार्गदर्शनाखाली पथकाकडून पोलिस बंदोबस्तात धडक कारवाई करण्यात आली. जेसीबीच्या साह्याने येथील अतिक्रमित पत्रा शेड हटविण्यात आले. सार्वजनिक जागा पुन्हा मोकळी करण्यात आली. या कारवाईमुळे परिसरातील नागरिकांनी समाधान व्यक्त केले.
शहरातील नागरिकांनी, व्यवसायिकांनी कोणत्याही परिस्थितीत रस्त्यावर अडथळा येईल अशा याप्रकारे अतिक्रमण करू नये. सार्वजनिक, महापालिकेच्या जागेवर अतिक्रमण करण्यात आल्याचे आढळून आल्यास तत्काळ कारवाई करण्यात येईल, असे आवाहन महापालिका अतिक्रमण प्रतिबंधक विभागाचे प्रमुख जगन्नाथ बनसोडे यांनी केले आहे.
