सोलापूर : सोलापूर महापालिका सार्वत्रिक निवडणुकीच्या अर्ज छाननी प्रक्रियेनंतर निवडणूक प्रशासनाचा अजब कारभार समोर आला आहे. शिवसेना शिंदे गटाचे जिल्हाप्रमुख तथा उमेदवार अमोल शिंदे यांचे नाव छाननीनंतर प्रसिद्ध करण्यात आलेल्या उमेदवारांच्या यादीतून चक्क वगळण्यात आल्याने खळबळ उडाली.
चूक लक्षात येताच दुसरी दुरुस्त यादी प्रसिद्ध करण्यात आली.
प्रभाग क्रमांक ७-ड (सर्वसाधारण) येथून अमोल शिंदे यांनी उमेदवारी अर्ज दाखल केला असून छाननी प्रक्रियेत त्यांचा अर्ज वैध ठरला होता. मात्र, निवडणूक निर्णय अधिकारी कार्यालयाकडून जाहीर करण्यात आलेल्या सद्यस्थितीतील उमेदवारांच्या यादीत त्यांच्या नावाऐवजी अन्य उमेदवाराचे नाव असल्याचे आढळून आले. त्यामुळे निवडणूक कार्यालयात गोंधळाचे वातावरण निर्माण झाले. हा प्रकार लक्षात येताच शिवसेना शिंदे गटाच्या कार्यकर्त्यांनी तीव्र नाराजी व्यक्त केली. परिस्थिती तणावपूर्ण झाल्याने पोलीस बंदोबस्तही तातडीने तैनात करण्यात आला. दरम्यान, अमोल शिंदे यांच्या मदतीला काँग्रेस शहराध्यक्ष चेतन नरोटे, राष्ट्रवादी काँग्रेस अजित पवार गटाचे शहराध्यक्ष संतोष पवार यांच्यासह विरोधी पक्षातील पदाधिकारीही धावून आले.
अमोल शिंदे व त्यांच्या समर्थकांनी निवडणूक निर्णय अधिकारी क्रमांक दोन विजया पांगारकर यांची भेट घेऊन हा प्रकार निदर्शनास आणून दिला. पाहणीनंतर टायपिंग करताना अनावधानाने चूक झाल्याचे स्पष्टीकरण देण्यात आले. यामध्ये तातडीने दुरुस्ती करून अमोल शिंदे यांचे नाव समाविष्ट असलेली नवी यादी प्रसिद्ध करण्यात येणार असल्याचे प्रशासनाकडून स्पष्ट करण्यात आले.
राज्य निवडणूक आयोगाच्या निर्देशानुसार निवडणूक प्रक्रिया वेगात सुरू असताना, आधी एबी फॉर्म प्रकरण आणि आता उमेदवार यादीतील ही चूक यामुळे प्रशासनाच्या कार्यपद्धतीवर प्रश्नचिन्ह उपस्थित केले जात आहे. अनावधानाने एवढी मोठी चूक होणे शक्य नसल्याची चर्चा कार्यकर्त्यांमध्ये रंगू लागली आहे.
या प्रकारामुळे उलटसुलट चर्चेला उधाण
महापालिका निवडणुकीसाठी अर्ज दाखल करण्याच्या शेवटच्या दिवशी भाजपाने वेळेनंतर ए-बी फॉर्म दिले. यावर सावरासावरी करण्याचा प्रकार होत आहे. तर आता उमेदवार यादीतून नाव गायब करण्याचा हा प्रकार म्हणजे प्रशासनाचा अजब कारभार सुरू आहे. अनावधानाने इतकी मोठी चूक राहत नाही शिवाय हा प्रकार इतका सहजासहजी होत नाही असे आरोप होत असून यामुळे उलट सुलट चर्चा कार्यकर्त्यांमध्ये आणि इच्छुकांमध्ये सुरू होती.
– छाननीनंतरच्या उमेदवार यादीतून अमोल शिंदे यांचे नाव वगळल्याने खळबळ
– शिवसेना शिंदे गटासह काँग्रेस व राष्ट्रवादीही अमोल शिंदे यांच्या पाठीशी
– टायपिंगमधील अनावधानाने चूक झाल्याचे निवडणूक अधिकाऱ्यांचे स्पष्टीकरण
– दुरुस्ती करून नव्याने उमेदवार यादी प्रसिद्ध करण्याचे प्रशासनाचे आश्वासन
– अखेर काही वेळानंतर चूक लक्षात येताच दुसरी दुरुस्त यादी प्रसिद्ध
