सोलापूर – विधानसभेचे उपाध्यक्ष अण्णा बनसोडे आणि शहर उत्तरचे आमदार विजयकुमार देशमुख दोघांनी एकाच कारमध्ये शुक्रवारी दुपारी एकत्र प्रवास केल्यामुळे राजकीय वर्तुळात चर्चेला उधाण आले आहे. अण्णा बनसोडे तीन दिवस सोलापूर दौऱ्यावर आहेत.या दौऱ्यात त्यांनी विविध क्षेत्रातील मान्यवरांच्या भेटीगाठी घेतल्या आहेत.शुक्रवारी सोलापुरातील श्री सिद्धेश्वर मंदिरामध्ये जाऊन दर्शन घेत असतानाच अण्णा बनसोडे यांनी आमदार विजयकुमार देशमुख यांना सोबत घेतले. कारमध्ये काहीकाळ सोबत प्रवास केला.
दरम्यान, याबाबत वार्तालाप कार्यक्रमात अण्णा बनसोडे यांना यासंदर्भात प्रश्न विचारले असता, विजयकुमार देशमुख हे वरिष्ठ आमदार आहेत. त्यांनी मंत्रीपद भोगले आहे. ते आमचे जुने मित्र आहेत. मंदिरामध्ये गाठभेट झाल्यानंतर गाडीत येण्याची विनंती केल्यावर त्यांनी मान्य केली. जुन्या आठवणींना यावेळी उजाळा मिळाल्याचे अण्णा बनसोडे यांनी सांगितले.
यावेळी राष्ट्रवादीचे जिल्हाध्यक्ष संतोष पवार, कार्याध्यक्ष जुबेर बागवान, प्रदेश उपाध्यक्ष आनंद चंदनशिवे सोबत होते. सर्वांनी एकत्र गाडीतच सेल्फीसुद्धा घेतला.
