सोलापूर : मजरेवाडी येथील आपना नगर येथे असलेल्या नवजीवन इंग्लिश मीडियम स्कूलचे अतिक्रमित दोन वर्ग, एक पत्रा शेड रूम आणि शाळेचे कार्यालय अखेर आज जेसीबीने पाडकामाची कारवाई महापालिकेकडून करण्यात आली. मोठ्या पोलीस बंदोबस्तात जेसीबीच्या साह्याने महानगरपालिकेच्या बांधकाम, नगररचना व अतिक्रमण प्रतिबंधक विभागाकडून मोठ्या पोलीस बंदोबस्तात ही कारवाई करण्यात आली. या बांधकामानंतर अखेर तो रस्ता अतिक्रमणमुक्त झाला.
मजरेवाडी येथील आपना नगर परिसरात नवजीवन इंग्लिश मीडियम स्कूल आहे. या शाळेने मूळ बांधकाम आराखड्याच्या बाहेर जाऊन सुमारे 22 फूट रस्त्यावर दहा फूट अतिक्रमण केले होते. त्या रस्त्यावरच अनधिकृतपणे संरक्षक भिंत, पत्राशेड असलेले कार्यालय, वीट बांधकामाच्या भिंतीसह वर पत्रे टाकलेले दोन वर्ग, एक पत्रा शेडची खोली उभारली होती. हे अतिक्रमण काढून टाकण्याबाबत या शाळेला महापालिकेकडून यापूर्वी नोटीस देण्यात आली होती, मात्र शाळेने स्वतःहून अतिक्रमण काढून घेतले नाही. यामुळे मंगळवारी 7 ऑक्टोबर 2025 रोजी महापालिकेच्यावतीने संरक्षक भिंत पाडण्याची कारवाई करण्यात आली होती. त्यावेळी संबंधितांकडून मोठा विरोधी झाला होता. दरम्यान, शाळेने केलेले इतर अतिक्रमण काढून टाकण्यास महापालिकेकडून शाळेला दोन दिवसांची मुदत देण्यात आली होती. या मुदतीत अतिक्रमण न काढल्यास महापालिकेकडून कारवाई करण्यात येईल, अशी सूचना देण्यात आली आहे. अखेर त्यानंतर आज शनिवारी महापालिकेच्या पथकाने पुन्हा कारवाई केली.
दरम्यान, आज शनिवारी महापालिकेच्या पथकाने मोठी कारवाई करत या शाळेचे दोन वर्ग जमीनदोस्त केले. एक पत्रा शेड रूम, पत्र्याचे कार्यालयही जेसीबीच्या साह्याने जागेवरच निष्काशीत केले. येथील कारवाई पूर्ण केली. सुमारे 22 फूट असलेल्या रस्त्यावर दहा फूट कब्जा करण्यात आला होता. हे सर्व अतिक्रमण काढून महापालिकेने अखेर हा रस्ता मोकळा केला, असे महापालिका अधिकाऱ्यांनी सांगितले.
या कारवाईवेळी एमआयडीसी पोलीस ठाणे तसेच अतिक्रमण प्रतिबंधक विभागाचे एकूण 50 पोलीस आणि सात अधिकारी तैनात होते. यावेळी कोणताही विरोध झाला नाही. संबंधितांनी सहकार्य केले असल्याचे महापालिका अधिकाऱ्यांनी सांगितले. कारवाई बघण्यासाठी लोकांनी मोठी गर्दी केली होती.
महापालिका आयुक्त डॉ. सचिन ओम्बासे यांच्या आदेशानुसार अतिक्रमण विरोधी मोहीम राबविण्यात येत आहे. महापालिका अतिक्रमण प्रतिबंधक विभागाचे नियंत्रण अधिकारी तपण डंके, या विभागाचे अधीक्षक हेमंतकुमार डोंगरे आणि बांधकाम विभागाचे उपअभियंता नीलकंठ मठपती यांच्या मार्गदर्शनाखाली ही कारवाई पूर्ण करण्यात आली. यावेळी महापालिका अतिक्रमण प्रतिबंधक विभागाचे प्रमुख हेमंतकुमार डोंगरे, कनिष्ठ अभियंता सुफियान पठाण , बांधकाम विभागाचे सहाय्यक अभियंता इर्शाद जरतार, कनिष्ठ अभियंता प्रमोद गोविंदवार, गणेश काकडे, सलमान शेख आदी उपस्थित होते होते.
