सांगोला – अहील्यानगर जिल्हाधिकारी कार्यालयात पुनर्वसन तहसीलदार म्हणून कार्यरत असणारे मूळचे मळोली (ता.माळशिरस) येथील व सध्या सांगोला येथील रहिवासी डॉ.हिमालय घोरपडे यांनी महाराष्ट्र लोकसेवा आयोगाच्या राज्यसेवा परीक्षेत संपूर्ण महाराष्ट्रात दुसरा क्रमांक प्राप्त केला. अकलूज येथील शंकरराव मोहिते महाविद्यालयाचे सेवानिवृत्त प्रा.डॉ.बाळकृष्ण घोरपडे व सांगोला येथील वामनराव शिंदे विद्यालयाच्या सेवानिवृत्त मुख्याध्यापिका सुवर्णप्रभा घोरपडे यांचे ते चिरंजीव आहेत.
डॉ.हिमालय घोरपडे यांचे प्राथमिक शिक्षण सांगोला येथे, उच्च माध्यमिक शिक्षण विवेकानंद सायन्स कॉलेज, कोल्हापूर येथे तर मुंबईतील नायर हॉस्पिटल सेंटर येथे एमबीबीएस पदवी प्राप्त केली. सन २०१९ मध्ये त्यांनी प्रथमच एमपीएससी परीक्षेत यश संपादन करून तहसीलदार पद मिळवले. यशदा, पुणे येथे प्रशिक्षण पूर्ण केल्यानंतर त्यांनी हिंगोली येथे पर्यवेक्षाधीन तहसीलदार म्हणून सेवा दिली. त्यानंतर सन २०२२ ते २४ या कालावधीत अप्पर तहसीलदार म्हणून कार्यरत राहून उल्लेखनीय प्रशासनिक कामगिरी बजावली. सध्या ते २०२४ पासून अहील्यानगर येथे पुनर्वसन तहसीलदार म्हणून जबाबदारी सांभाळत आहेत. डॉ.हिमालय घोरपडे यांच्या या यशाबद्दल त्यांच्यावर सर्व स्तरातून अभिनंदनाचा वर्षाव होत आहे.
