मुंबई – ‘मतचोरी, बोगस मतदान, दुबार मतदार आदी त्रुटी दूर करण्यासाठी विरोधकांकडून जोरदार आंदोलन केले जात असताना निवडणूक आयोगाने त्यांच्या मागण्याला वाटण्याच्या अक्षता लावित स्थानिक स्वराज्य संस्थांच्या निवडणुकाचे सोमवारी बिगुल वाजवले. पहिल्या टप्यात
राज्यातील 246 नगरपरिषद आणि 42 नगरपंचायत निवडणूक कार्यक्रम जाहीर केला आहे. त्यासाठी 2 डिसेंबरला मतदान तर 3 डिसेंबरला मतमोजणी होणार आहे.संबंधित ठिकाणी आजपासून आदर्श आचारसहिता लागू झाली आहे.
राज्य निवडणूक आयोगाचे आयुक्त दिनेश वाघमारे यांनी पत्रकार परिषदेत निवडणूक कार्यक्रम घोषित केला. ते म्हणाले,’ 31 जानेवारी 2026 पूर्वी स्थानिक स्वराज्य संस्थांच्या निवडणुका घेण्याचे सर्वोच्च न्यायालयाचे आदेश आहेत. त्यानुसार निवडणुकीस पात्र असलेल्या 246 नगरपरिषदा आणि 42 नगर पंचायतींसाठी निवडणूक घेण्यात येत आहे. यामध्ये 15 नवीन नगरपंचायतींचा समावेश असून अद्याप 105 नगर पंचायतीची मुदत संपलेली नाही.
दुबार मतदारांची वेगळी नोंद केलेली असणार आहे. दुबार मतदाराच्या नावापुढं डबल स्टार असणार आहे. दुबार मतदारासमोर डबल स्टार आले आणि त्यानं रिस्पॉन्स दिला नाही तर त्या मतदाराकडून एक डिक्लेरेशन घेतलं जाईल. या मतदान केंद्रानंतर दुसरीकडे मतदान करणार नाही, असं त्याच्याकडून लिहून घेतलं जाईल, असे सांगून वाघमारे म्हणाले,’ 10 नोव्हेंबरपासून अर्ज दाखल करता येणार असून अंतिम मुदत 17 नोव्हेंबरपर्यंत आहे. अर्ज माघारीसाठी 21 नोव्हेंबरपर्यंतची मुदत आहे. याचबरोबर, 2 डिसेंबरला मतदान होणार असून 3 डिसेंबरला निकाल जाहीर होईल.
———
असा आहे निवडणुकांचा कार्यक्रम !
नामनिर्देशन पत्र – 10 नोव्हेंबर
अंतिम मुदत – 17 नोव्हेंबर
छाननी – 18 नोव्हेंबर
अर्ज माघारी घेण्याची तारीख – 21 नोव्हेंबर
निवडणूक चिन्ह वाटप – 26 नोव्हेबर
मतदान – 2 डिसेंबर
निकाल – 3 डिसेंबर
एकूण मतदार व मतदान केंद्र
पुरुष मतदार- 53,79,931
महिला मतदार- 53,22,870
इतर मतदार- 775
एकूण मतदार- 1,07,03,576
एकूण मतदान केंद्र- सुमारे 13,355
एकूण जागा आणि आरक्षित जागा
निवडणूक होत असलेल्या नगरपरिषदा- 246
निवडणूक होत असलेल्या नगरपंचायती – 42
एकूण प्रभाग- 3,820
एकूण जागा- 6,859
महिलांसाठी जागा- 3,492
अनुसूचित जातींसाठी जागा- 895
अनुसूचित जमातींसाठी जागा- 338
नागरिकांचा मागासवर्ग प्रवर्गासाठी जागा- 1,821
विभागनिहाय नगरपरिषद-नगरपंचायती निवडणूक
कोकण – 17
नाशिक -49
पुणे -60
संभाजीनगर -52
अमरावती -45
नागपूर -55
