पूर्णा – येथे गाढवांची आरोग्य तपासणी व उपचार शिबिराचे आयोजन करण्यात आले होते. यावेळी एकूण २२७ गाढवांचे लसीकरण, निर्जंतुकीकरण व विविध औषधोपचार करण्यात आले. येथील गाढवपालकांच्या आग्रहास्तव सगरोळी (ता. बिलोली) येथील ‘धर्मा डॉंकी सँक्च्युरी’ संस्थेतर्फे शुक्रवार (दि. १६) रोजी या शिबिराचे आयोजन करण्यात आले होते.
या शिबिरामध्ये २५ गाढवपालकांनी आपली २२७ गाढवे आरोग्य तपासणीसाठी आणली होती. सर्व गाढवांना धनुर्वात प्रतिबंधात्मक लसीकरण तसेच जंतनाशक औषधे देण्यात आली. यासोबतच जखमांवर मलमपट्टी, डोळ्यांच्या आजारांवर उपचार, अशक्त जनावरांना इंजेक्शन व आवश्यक औषधे देण्यात आली. ही सर्व सेवा मोफत उपलब्ध करून देण्यात आल्याने गाढवपालकांनी समाधान व्यक्त केले. यावेळी संस्थेचे विश्वस्त अभिजीत महाजन यांनी पशुपालकांशी संवाद साधला. गाढवांची तपासणी व उपचार धर्मा डॉंकी सँक्च्युरीचे डॉ. निहाल मुल्ला यांनी केले. यावेळी भास्कर बुच्छलवार, अनन्यकश्यप प्रभाकर राव, शंकर थोटवे यांनी सहकार्य केले.
शिबिरास परभणी जिल्हार पशुसंवर्धन विभागाचे उपयुक्त डॉ. मनोज घाटे, सहाय्यक आयुक्त डॉ. प्रिया धुतराज, सहा. आयुक्त एल. टी. कनले, पशुधन विकास अधिकारी डॉ. राजू कोकरे, आर. डब्ल्यू. कचरे, डॉ. आर. डी. कसबे यांनी भेट देऊन पाहणी केली. पूर्णा येथे नदीतील रेती वाहतुकीसाठी गाढवांचा मोठ्या प्रमाणात उपयोग होत असल्याने येथे गाढवांची संख्या लक्षणीय आहे. त्यामुळे त्यांच्या आरोग्य तपासणी व औषधोपचाराची गरज होती. यापुढे वर्षातून दोन वेळा अशा शिबिरांचे आयोजन करण्यात येणार असून गरजेनुसार गाढवपालकांना प्रशिक्षणही दिले जाणार आहे.
विश्वस्त, अभिजीत महाजन, ‘धर्मा डॉंकी सँक्च्युरी’, सगरोळी.
