अक्कलकोट – तालुक्यातील तडवळ येथील ओंकार साखर कारखाना युनिट क्र. ५ यांच्या वतीने दिवाळी सणा निमित्त ऊस उत्पादक शेतकऱ्यांसाठी चेअरमन बाबुराव बोत्रेपाटील यांनी दिलेल्या आश्वासनाप्रमाणे, जिल्ह्यात सर्वात आधी मोफत साखर वाटप कार्यक्रम सुरू केल्याने शेतकऱ्यांमध्ये समाधान आणि आनंदाचे वातावरण निर्माण झाले आहे.
कारखान्याचे चेअरमन बाबुराव बोत्रेपाटील संचालक ओमराजे बोत्रेपाटील, संचालिका सौ. रेखाताई बोत्रेपाटील आणि संचालक प्रशांत बोत्रेपाटील,कारखान्याचे जनरल मॅनेजर विठ्ठल गायकवाडयांच्या मार्गदर्शनाखाली हा उपक्रम राबविण्यात आला आहे. .
शुक्रवार १६ ऑक्टोबर ते सोमवार २० ऑक्टोबर २०२५ पर्यंत सकाळी ८.०० ते सायं. ८.०० पर्यंत ओंकार साखर कारखाना, युनिट क्र. ५, तडवळ येथे मोफत साखर वाटप सुरू करण्यात आला आहे. ऊस पुरवठादार शेतकऱ्यांनी कारखान्याकडे नोंदणीकृत मोबाईल क्रमांक असलेला अँड्रॉईड फोन सोबत आणणे आवश्यक आहे. त्या मोबाईलमध्ये “Onkar Unit 5” हे ऍप डाउनलोड करून चालू करावे, त्यानंतर साखर वितरणाची नोंद केली जाईल.
साखर मोफत असून साखरेचे बॅग पॅकिंग स्वरूपात उपलब्ध असल्याने, स्वतंत्र पिशवी/बॅग आणण्याची आवश्यकता नसल्याने कोणी पिशवी/बॅग आणू नये असे कारखाना तर्फे आवाहन केले आहे.
चौकट
शेतकऱ्यांनी जितका जास्त ऊस पुरवठा करेल त्या पटीने साखर मोफत वाटप सुरू केले आहेत. कारखान्याला ३० मे.टन पर्यंत ऊस पुरवठा करणाऱ्या शेतकऱ्याला १० किलो साखर वाटप केले असून ५० मे.टनला २० किलो साखर, १०० मे.टनला ३० किलो साखर, १५० मे. टनला ४० किलो साखर २०० मे.टनला ५० किलो साखर, ३०० मे.टनला ७० किलो साखर तसेच ३०० मे.टन पेक्षा अधिक ऊस पुरवठा करणाऱ्या शेतकऱ्याला १०० किलो साखर मोफत वाटप करण्यात येत आहे.याशिवाय प्रत्येक कर्मचाऱ्याला १० किलो साखर मोफत वाटप सुरू केले आहेत.शेतकऱ्यांचे हित जपणे, हीच आमची परंपरा आहे. ओंकार साखर कारखाना नेहमीच ऊस उत्पादक शेतकऱ्यांच्या हितासाठी तत्पर राहिला आहे.दिवाळी सणाच्या शुभमुहूर्तावर सुरू केलेल्या या साखर वाटप उपक्रमामुळे शेतकऱ्यांमध्ये विश्वास, समाधान आणि अभिमानाचा उत्सव निर्माण झाला आहे.
