सांगोला – तालुक्यात ७ जि.प गट व १४ पं.स गण यासाठी झालेल्या निवडणुकीत ७० टक्के मतदान झाले. १ लाख ८३ हजार ६६२ मतदारांनी आपल्या मतदानाचा हक्क बजावला. यामध्ये ९४ हजार ९७२ पुरुष व ८८ हजार ४१४ स्त्री व इतर २ मतदार यांचा समावेश आहे. सकाळच्या सत्रात ज्येष्ठ नागरिक, महिला व तरुण मतदार उत्स्फूर्तपणे मतदानासाठी बाहेर पडलेले दिसून आले. काही ठिकाणी मतदानासाठी रांगा लागल्याचे दिसून आले. कामानिमित्त व नोकरीसाठी बाहेरगावी असलेल्या मतदारांनी मतदानाचा हक्क बजावण्यासाठी सकाळपासून मतदान केंद्रावर दिसून आले. या निवडणुकीत ७ जिल्हा परिषद सदस्यसाठी ४१ व १४ पंचायत समिती सदस्यसाठी ५४ उमेदवार रिंगणात उभे आहेत.
मतदानाची आकडेवारी घेण्यासाठी नियंत्रण कक्षात १० टेबल ठेवले होते. नियंत्रित अधिकारी बाळासाहेब मोरे, पथक प्रमुख सचिन कुंभार, आकाश गोडसे, समाधान वाघमोडे, अमोल देशमुख, अण्णासो सरगर, आरएनटी सुनील बेलभंडारे, सोमनाथ साळुंखे हे निवडणूक निर्णय अधिकारी बी.आर.माळी व सहा.निवडणूक निर्णय अधिकारी बाळूताई भागवत यांचे नियंत्रणात कामकाज करीत होते अशी माहिती मीडिया नोडल अधिकारी मिलिंद सावंत यांनी दिली.
सांगोला पोलीस निरीक्षक विनोद घुगे यांच्या मार्गदर्शनाखाली तालुक्यात चोख पोलिस बंदोबस्त ठेवण्यात आला होता. सदर निवडणुकीसाठी तालुका आरोग्य अधिकारी डॉ.संदीप देवकते यांच्या मार्गदर्शनाखाली २७४ मतदान केंद्रावर वैद्यकीय अधिकारी, आरोग्य सेवक, सेविका, सहाय्यक, सहाय्यिका, आशाताई व गटप्रवर्तक उपस्थित होते. तसेच ग्रामपंचायत अधिकारी, महसूल अधिकारी, मंडलाधिकारी, पोलीस पाटील, बीएलओ, क्षेत्रिय अधिकारी आणि आचारसंहिता कक्षाचे प्रमुख उमेशचंद्र कुलकर्णी यांनी परिश्रम घेतले. तालुक्यात सर्वत्र शांततेत मतदान पार पडले.
तालुक्यातून ३२ क्षेत्रिय अधिकारी स.६ वा. पासून २७४ मतदान केंद्रावर बारकाईने लक्ष ठेवून दिवसभर सतत भेटी देऊन अडचणीचे निराकरण करणे, मॉक पोल अहवाल सादर करणे हे काम करत होते. सुरुवातीला काही केंद्रावर मॉकपोल पूर्वी बॅलेट युनिट बदलून दिल्याने कोठेही अडचण निर्माण झाली नसल्याचे निवडणूक निर्णय अधिकारी बी.आर.माळी व सहा.निवडणूक निर्णय अधिकारी बाळूताई भागवत यांनी सांगितले.
चोपडी जि.प.गट व पं.स.गणासाठी मतदान करण्यासाठी चोपडी येथील बुथवर झालेली मतदारांची गर्दी
