देगलूर : महाराष्ट्र उपमुख्यमंत्री स्व. अजितदादा पवार यांच्या २८ जानेवारी रोजी विमान अपघातात दुर्दैवी निधन झाले. त्यानंतर राष्ट्रवादी काँग्रेससह महाराष्ट्रातील चाहत्यांकडून दुखःद भावना व्यक्त केल्या जात आहेत. आज दि. ०३ फेब्रुवारी रोजी नगर परिषद देगलूर येथे स्वर्गीय उपमुख्यमंत्री अजितदादा पवार यांच्या अस्थी कलश दर्शन व शोकसभा आयोजित करण्यात आली.
या शोकसभेत जड अंतःकरणाने देगलूरकरांनी घेतला स्व. अजित पवारांच्या अस्थी कलशाचे दर्शन घेतले. देगलूर नगरपरिषदेवर राष्ट्रवादी काँग्रेस (अजित पवार गट) पक्षाची सत्तास्थापनेनिमित्त विजयी सभा होणार होती परंतु दुर्दैवाने आज दादांच्या स्मरणार्थ शोकसभा घ्यावी लागली.
महाराष्ट्राचा दादा माणूस आणि कामाचा माणूस म्हणून स्वर्गीय अजितदादा पवार यांची ओळख संपूर्ण महाराष्ट्राला होती. २८ जानेवारी रोजी बारामतीला सभेसाठी जात असताना विमान अपघातात अजितदादा पवार यांचा दुर्दैवी मृत्यू झाला. ही बातमी काही क्षणात महाराष्ट्रात पसरली आणि सर्व दादांच्या चाहत्यांवर शोककळा पसरली. ज्या ज्या कार्यकत्यांना स्वर्गीय अजितदादा पवार यांच्या अंत्यविधीचे दर्शन घेता आले नाही अशांना किमान अस्थी कलशाचे दर्शन व्हावे म्हणून महाराष्ट्र विविध ठिकाणी अस्थी कलश दर्शन व शोकसभा आयोजित करण्यात येत आहे. याच पार्श्वभूमीवर देगलूर नगरपरिषदेच्या प्रांगणात या शोकसभेचे आयोजन करण्यात आले.
यावेळी लोहा कंधार मतदारसंघाचे आमदार प्रताप पाटील चिखलीकर, देगलूर बिलोली मतदारसंघाचे आमदार जितेश अंतापुरकर, माजी आमदार मोहन हंबर्डे, माजी आमदार सुभाष साबणे, राष्ट्रवादीचे प्रदेश उपाध्यक्ष व्यंकटराव पाटील गोजेगावकर, जिल्हाध्यक्ष शिवराज पाटील होटाळकर, राष्ट्रवादीचे नेते लक्ष्मीकांत पदमवार, डॉ. मीनल खतगावकर, देगलूर नगरपरिषदेच्या नगराध्यक्षा सौ. विजयमाला बालाजी टेकाळे, मुख्याधिकारी निलम कांबळे, माजी उपनगराध्यक्ष बालाजीराव टेकाळे, उपनगराध्यक्ष अॅड अंकुश देसाई देगावकर, शहराध्यक्ष देवेंद्र मोतेवार, तालुकाध्यक्ष राहुल देसाई, नगरसेवक नंदकुमार शाखावार, नगरसेवक सुमंत कांबळे, डॉ. पुजा गायकवाड, विक्रम नागशेट्टीवार, पंकज देशमुख करडखेडकर, मारोती वाडेकर, अर्जुन गायकवाड, सय्यद अजिज, बालाजी मैलागिरे, नाना मोरे यांच्यासह नगरसेवक – नगरसेविका, विविध पक्षांचे कार्यकर्ते, नगरपरिषदेचे कर्मचारी आणि मोठ्या प्रमाणात नागरिक उपस्थित होते.
विजय सभाऐवजी दुर्दैवाने शोकसभा
राष्ट्रवादी काँग्रेस (अजित पवार गट) पक्षाच्या नगरपरिषदेच्या प्रचारासाठी स्वर्गीय अजितदादा पवार यांचे देगलूर येथील मोंढा मैदानावर प्रचार सभा आयोजित करण्यात आली होती. त्यासभेत पवार म्हणाले होते की, देगलूर नगरपरिषदेवर राष्ट्रवादीची सत्ता आली तर विजयी सभेसाठी अजितदादा पवार येणार होते परंतु दुर्दैवाने आज दादांच्या स्मरणार्थ शोकसभा आयोजित करावी लागली.
लक्ष्मीकांत पदमवार यांना अश्रू अनावर झाले
देगलूर येथील शोकसभेत स्वर्गीय पवारांच्या आठवणीत भावना व्यक्त करीत असताना राष्ट्रवादीचे नेते लक्ष्मीकांत पदमवार यांना अश्रू अनावर झाले. स्वर्गीय अजितदादा पवार यांच्या आठवणींना उजाळा देताना लक्ष्मीकांत पदमवार यांच्या डोळ्यातून अश्रू तरळले. देगलूर नगरपरिषदेच्या निवडणुकीत लक्ष्मीकांत पदमवार श यांना स्वर्गीय अजितदादा पवारांनी पक्षबांधणी आणि प्रचार मोहिमेसाठी पुर्ण स्वातंत्र्य दिले होते. त्यांच्या पाठबळामुळे पदमवार आणि कार्यकर्त्यांनी पक्षाला विजय मिळवून दिले.
निधी संदर्भात दादांनी दिलेला शब्द पाळला जाईल : आ. प्रताप पाटील
महाराष्ट्राचे उपमुख्यमंत्री स्वर्गीय अजितदादा पवार यांनी देगलूरच्या विकास कामाला निधी कमी पडू देणार नाही, असे प्रचारसभेत सांगितले होते. दुर्दैवाने त्यांचा दुःखद निधन झाला. स्वर्गीय पवारांच्या पश्चात त्यांच्या पत्नी सुनेत्रा पवार ह्या महाराष्ट्राच्या उपमुख्यमंत्री झाल्या. त्यांच्या नेतृत्वाखाली राष्ट्रवादी काँग्रेस कार्यकर्त्यांना जोडून ठेवेल तसेच राज्याचे मुख्यमंत्री देवेंद्र फडणवीस यांच्याकडे जाऊन निधी संदर्भात स्वर्गीय अजितदादांचा शब्द वाया जाऊ देणार नाही असे, आ. प्रताप पाटील चिखलीकर यांनी सांगितले.
गोदावरी नदीत अस्थी कलशाचे विसर्जन
स्वर्गीय अजितदादा पवार यांच्या अस्थी कलशाचे दर्शन नायगाव, नरसी, खानापूर फाटा, देगलूर, मुखेड आदीं ठिकाणी अस्थी कलशाचे दर्शन झाल्यानंतर संध्याकाळी नांदेड येथील गोदावरी नदीत अस्थी कलशाचे विसर्जन करण्यात येणार असल्याची सांगण्यात आले. एकूणच स्वर्गीय अजितदादा पवार यांच्या अकाली जाण्याने एक कामाचा चांगला माणूस मुकला आहे, अशा भावना जनसामान्यांतून व्यक्त होत आहे.
