सोलापूर – सनातन वैदिक हिंदू धर्मातील महत्त्वाचा धार्मिक महिना म्हणून मार्गशीर्ष महिन्याकडे पाहिले जाते. या महिन्यात तीर्थक्षेत्र बाळे येथील श्री खंडोबा देवाची महिनाभर यात्रा भरते. यात्रेच्या पहिला रविवारी सोलापूर शहर जिल्ह्यासह कर्नाटक आणि आंध्र प्रदेशातील असंख्य भाविक श्रींच्या दर्शनासाठी मंदिरात पहाटेपासूनच दाखल झाले होते. यावेळी भंडाऱ्याची उधळण करत मुखी “येळकोट येळकोट जय मल्हार सदानंदाचा येळकोट घे ” असे म्हणत “पारंपारिक संबळाच्या तालावर मल्हारी मार्तंडचा एकच जयघोष करण्यात आला.
दरम्यान, श्रींचा गर्भगाभारा आकर्षक व सुवासिक फुलांनी सजवण्यात आला होता. यामुळे सर्वत्र नवचैतन्याचे आणि प्रसन्नतेचे वातावरण निर्माण झाले होते. त्याच पद्धतीने मंदिराच्या दर्शनी भागात फुलांच्या पाकळ्यांनी सजावट करण्यात आली होती. “बाळेगावचा राजा मल्हारी माझा”! या अक्षरात फुलांच्या पाकळ्यांनी सजावट केल्याने मंदिर परिसरात एक वेगळी शोभा निर्माण झाले होते. मंदिरात असंख्य भाविकांनी वारू सोडण्याचा कार्यक्रम संपन्न केला. अबालवृद्ध भाविकांना श्रींचे दर्शन घेण्यासाठी कोणतीही अडचण येऊ नये, यासाठी दर्शन रांगेची व्यवस्था करण्यात आली आहे. दर्शन रांगेच्या माध्यमातून असंख्य भावीक दर्शन घेत असल्याचे दिसून येत आहे.
तत्पूर्वी दीपमाळेस तेल अर्पण केले. काही भाविकांनी नवस फेडण्याचा कार्यक्रम संपन्न केला. त्यामध्ये तळी भंडारा उचलणे, वारू सोडणे, लंगर तोडणे, अशा धार्मिक विधींचा समावेश होता. काही भाविकांनी लहान मुलांचे जावळ काढणे तसेच
नवीन लग्न झाल्यानंतर जागरण गोंधळ करणे असे धार्मिक विधी देखील संपन्न केले. यात्रेच्या पहिल्या रविवारी भाविकांनी श्रींचे दर्शन घेण्यासाठी एकच गर्दी केल्याने सर्वत्र भाविकांची एकच गर्दी झाली होती. यात्रेच्या पहिल्या रविवारी सुमारे ४० हजाराहून अधिक भाविकांनी श्रींचे दर्शन घेतल्याची प्राथमिक माहिती मंदिर समितीच्या वतीने देण्यात आली.
चौकट
सीसीटीव्ही कॅमेराच्या माध्यमातून मंदिर परिसरावर नजर
यात्रेच्या अनुषंगाने भाविकांची वाढणारे गर्दी लक्षात घेता मंदिर समिती आणि पोलीस प्रशासनाच्या वतीने सुरक्षिततेच्या दृष्टिकोनातून संपूर्ण मंदिर परिसरात सीसीटीव्ही कॅमेराची करडी नजर ठेवण्यात आली आहे. श्रींच्या गर्भ गाभाऱ्यापासून ते मंदिराच्या दर्शनी भागापर्यंत प्रत्येक टप्प्याटप्प्यावर सीसीटीव्ही कॅमेरे लावण्यात आले आहेत. एकूण २८ कॅमेऱ्याच्या माध्यमातून मंदिर परिसरावर नजर ठेवण्यात येत आहे.
चौकट
श्रींच्या गर्भ गाभाऱ्यात चांदीचा मखर
श्रींच्या गर्भ गाभाऱ्यात सागवानी लाकडापासून मखर बनवण्यात आला आहे. त्या मखरावर चांदीचा लेप लावण्यात येणार आहे. यासाठी मंदिर समितीच्या वतीने असंख्य भाविक भक्तांना चांदी अर्पण करण्यासाठी आवाहन केले जात आहे.
कोट
यात्रेच्या पहिल्या रविवारी मंदिरात भाविकांची मोठी मांदियाळी
यात्रेच्या पहिल्या रविवारी पहाटे पाच वाजता काकडा आरती करण्यात आली. तदनंतर सकाळी आठ वाजता अभिषेक आणि महापूजा संध्याकाळी आठ वाजता महापूजा व पालखी सोहळा पार पडला. त्यानंतर सायंकाळी नऊ वाजता अश्व आणि नंदीध्वजासह मंदिर प्रदक्षिणा धार्मिक विधी संपन्न झाले. यावेळी मानकरी पाटील, तोडकरी, कांबळे, सुरवसे, गावडे, यांना मानाचे वेडे देण्यात आले. मंदिराच्या सजावटीसाठी सुमारे ३०० किलो सुवासिक फुलांचा वापर करण्यात आला.
– सागर पुजारी, मंदिराचे पुजारी तथा मंदिर समिती सचिव
