माहूर / नांदेड – माहूर तालुक्यातील बामनगुडा येथील शेतात काम करणाऱ्या एका महिलेवर बिबट्याने अचानक हल्ला करून महिलेचे तोंड जबड्यात धरून चावा घेतल्याने महिला गंभीर जखमी झाल्याची धक्कादायक आणि भीतिदायक घटना आज २३ रोजी दुपारी घडल्याने खळबळ उडाली आहे. बिबट्याच्या तावडीतून सुटलेल्या गंभीर जखमी महिलेस नजिकच्या सिंदखेड येथील प्राथमिक आरोग्य केंद्रात उपचार करून माहूर ग्रामीण रुग्णालयामार्फत पुढील उपचारासाठी यवतमाळला हलविण्यात आले आहे. ही धक्कादायक घटना ऐण दुपारी २ वाजताच्या सुमारास घडल्याने शेतकऱ्यासह नागरिकात प्रचंड दहशत निर्माण झाली असून नरभक्षी बिबट्याला तात्काळ जेर बंद करण्याची मागणी होत आहे.
माहूर तालुक्यात अनेक बिबटे पिल्लांसहित धुमाकूळ घालत असून, आतापर्यंत बिबट्याने नागरिकावर हल्ला केला नव्हता परंतु आज बामनगुडा येथील शेतात काम करणारी महिला लता सुरेश तोडसाम वय ३५ ही आपले पती,मुलगा आणि एका शेतशेजाऱ्या सोबत कापूस वेचण्याचे काम करत होती. तितक्यात काही काम निघाल्याने पती सुरेश तोडसाम हे घरी गेले. तितक्यातच शेताला लागून असलेल्या जंगलातून बिबट्याने सदरील महिलेवर अचानकपणे झडप घालून महिलेचे मुंडके जबड्यात पकडून कडाडून चावा घेतल्याने महिलेला गालावर गंभीर जखम झाली तर कपाळावर तसेच मानेवरही मोठ्या प्रमाणात त्याचे दात खोल रुतल्याने जीवघेण्या जखमा झाल्या. घटना पाहून मुलाने आणि शेजाऱ्याने जोरात आरडा ओरड केल्याने महिलेला सोडून बिबट्याने जंगलात पळ काढला त्यामुळे महिलेचा जीव वाचला.
मुलाने घटना वडीलांना कळविल्याने त्यांनी लगेच शेतात धाव घेत महिलेला घरी आणून सिंदखेडच्या प्रथमिक आरोग्य केंद्रात दाखल केले असता येथे डॉ.बी.एम. मोरे यांनी प्रथमोपचार करून माहूरच्या ग्रामीण रुग्णालयात पाठवले. येथे डॉ. मंगेश नागरगोजे, ब्रदर निलेश भिलावेकर, कक्षसेवक तुळशीदास शेंडे, सुरक्षारक्षक आकाश मुंडे यांनी उपचार करून १०८ द्वारे डॉ. सत्यम गायकवाड, चालक सिद्धार्थ भालेराव यांचे निगराणीत यवतमाळला येथे पुढील उपचारासाठी पाठवले.
महिलेवर हल्ला करून बिबट्या नरभक्षी झाल्याने त्याला तात्काळ जेर बंद करावे, अशी मागणी नागरिकांतून होत असून ,वन विभागाने तात्काळ उचित उपाययोजना करणे गरजेचे झाले आहे.अन्यथा! एखाद्या नागरिकाचा जीव जाण्याची शक्यता आजच्या या घटनेवरुन नाकारता येत नाही.
