तभा वृत्तसेवा
नायगांव / नांदेड – नांदेड जिल्ह्यातील नायगाव तालुक्यातील कृष्णूर पंचतारांकित औद्योगिक वसाहती परिसरात दुपारी अचानक बिबट्याने हल्ला चढवून नागरिकांमध्ये प्रचंड भीतीचे वातावरण निर्माण केले. दुपारच्या सुमारास अचानक समोर आलेल्या बिबट्याने तरुण श्रीकांत पोपुलवाड यांच्यावर झडप घालत हल्ला केला. मात्र जीव वाचवण्यासाठी त्यांनी केलेल्या प्रचंड आरडाओरडामुळे बिबट्या दचकला आणि पळून गेला. त्यामुळे मोठी दुर्घटना टळली.
हल्ल्यात जखमी झालेल्या श्रीकांत पोपुलवाड यांच्यावर घुंगराळा येथील डॉ. राठोड यांच्या दवाखान्यात प्राथमिक उपचार करण्यात आले असून त्यांची प्रकृती स्थिर आहे.
घटनेची माहिती मिळताच राष्ट्रवादी काँग्रेस पक्षाचे प्रदेश सरचिटणीस वसंत सुगावे पाटील यांनी दवाखान्यात भेट देऊन जखमी तरुणाच्या प्रकृतीची विचारपूस केली. तसेच त्यांनी वन परिक्षेत्राधिकारी श्री. देवकत्ते यांच्याशी तातडीने संपर्क साधून जखमींची भेट घडवून आणली आणि पुढील कारवाईबाबत सूचना केल्या.
दरम्यान, वनविभागाची पथक घटनास्थळी दाखल झाले असून बिबट्याचा शोध घेण्यासाठी मोहिम राबवण्यात येत आहे. घुंगराळा, कृष्णूर परिसरातील नागरिक, शेतकरी व कामगारांनी सतर्क राहावे, असा इशारा विभागाकडून देण्यात आला आहे. बिबट्या कुठे दिसल्यास तत्काळ वनविभागाशी संपर्क साधण्याचे आवाहन करण्यात आले आहे.
या घटनेने वन विभागाच्या निष्क्रियतेवर प्रश्नचिन्ह उभे राहिले असून परिसरातील नागरिकांनी वन विभागाने तत्परतेने उपाययोजना कराव्यात, अशी जोरदार मागणी केली आहे. परिसरात पुन्हा अशी घटना घडू नये म्हणून बिबट्याला तातडीने पकडणे अत्यावश्यक झाले आहे.
