सोलापूर – दक्षिण सोलापूर तालुका शिक्षण मंडळ संचलित व्ही.जी. शिवदारे कॅालेज ॲाफ आर्ट्स, कॉमर्स अँड सायन्स येथे पुराभिलेख संचालनालय व महाविद्यालय यांच्या संयुक्त विद्यमाने आयोजित मोडी लिपी प्रशिक्षण वर्गाचा प्रमाणपत्र वितरण समारंभ दि. २८ नोव्हेंबर रोजी मोठ्या उत्साहात संपन्न झाला. महाराष्ट्राच्या ऐतिहासिक आणि सांस्कृतिक परंपरेचा अनमोल ठेवा असलेल्या मोडी लिपीचे संवर्धन करून ती पुढील पिढीपर्यंत पोहोचवण्याच्या उद्देशाने हा कार्यक्रम आयोजित करण्यात आला होता.
कार्यक्रमास विविध क्षेत्रांतील मान्यवरांची विशेष उपस्थिती लाभली. सोलापूर सिद्धेश्वर सहकारी बँकेचे चेअरमन मा. नरेंद्र गंभीरे यांनी प्रमुख अतिथी म्हणून विद्यार्थ्यांचे अभिनंदन केले. मोडी लिपीचे संवर्धन हे आजच्या पिढीचे कर्तव्य असल्याचे सांगून, त्यांनी या लिपीत दडलेला इतिहासाचा सुवर्णकाळ जाणून घेण्याचे आवाहन केले. आधुनिक युगात पारंपरिक ज्ञानाचे महत्त्व अधोरेखित केले. महाराष्ट्र केमिस्ट अँड ड्रगिस्ट असोसिएशनचे माजी अध्यक्ष बसवराज मणुरे यांनी मोडी लिपीच्या अभ्यासामुळे इतिहासाची अचूकता आणि माहितीचे शास्त्रशुद्ध दस्तऐवजीकरण कसे शक्य होते, यावर प्रकाश टाकला. विद्यार्थ्यांनी सांस्कृतिक परंपरेशी जोडले जाणे ही अभिमानाची बाब असल्याचे त्यांनी नमूद केले.
मोडी लिपी परीक्षेमध्ये उल्लेखनीय यश संपादन करणाऱ्या प्रथम क्रमांक -समरसिंग शिंदे,
द्वितीय क्रमांक – संजय घाळे, तृतीय क्रमांक -संतोष दळवी या विद्यार्थ्यांचा मान्यवरांच्या हस्ते गौरव करण्यात आला. कार्यक्रमाचे अध्यक्षस्थान दक्षिण सोलापूर तालुका शिक्षण मंडळाचे विश्वस्त प्रा. आर. वाय. पाटील यांनी भूषविले. त्यांनी मोडी लिपी ही महाराष्ट्राची सांस्कृतिक ओळख असून, तिचे पुनरुज्जीवन अत्यंत आनंददायी असल्याचे सांगितले. संस्थेच्या या उपक्रमाचे त्यांनी मनःपूर्वक कौतुक केले.
महाविद्यालयाचे प्राचार्य डॅा. डी. एस. सुत्रावे यांनी प्रास्ताविकामध्ये मोडी लिपी अभ्यासक्रमाची माहिती दिली. मोडी लिपी शिकल्याने विद्यार्थ्यांना ऐतिहासिक कागदपत्रे व शिलालेख वाचण्याची क्षमता प्राप्त होते, जी संशोधन क्षेत्रात उपयुक्त ठरते, असे त्यांनी सांगितले. प्रा. संगीता बावगे यांनी प्रशिक्षण आयोजनात घेतलेल्या विशेष परिश्रमा बद्दल त्यांचा सन्मान करण्यात आला.
प्रमुख पाहुण्यांचा परिचय मृगेंद्र हंजगी यांनी करून दिला. समारंभात उत्तीर्ण झालेल्या विद्यार्थ्यांना मान्यवरांच्या शुभहस्ते प्रमाणपत्रे प्रदान करण्यात आली.
विद्यार्थ्यांनी मोडी लिपी संवर्धनासाठी पुढील उपक्रमांतही सहभागी होण्याची तयारी व्यक्त केली.
कार्यक्रमास फार्मसी महाविद्यालयाचे प्राचार्य डॉ. एम. एस. कलशेट्टी, डॉ. शुभदा उपासे, मा.प्रा. चंद्रशेखर उमरजकर, डॉ. स्मितांजली दामा आदींसह विद्यार्थी, पालक आणि नागरिक मोठ्या संख्येने उपस्थित होते. कार्यक्रमाचे सूत्रसंचालन प्रा. डॉ. बनसोडे डी. डी. यांनी केले, तर आभार प्राजक्ता चौगुले यांनी मानले.
