अक्कलकोट – विधानसभा क्षेत्रातील पाच ग्रामपंचायतींना स्वतंत्र कार्यालयाची इमारत बांधण्यासाठी एक कोटी पाच लाख रुपये मंजूर करण्यात आल्याची माहिती अक्कलकोटचे आमदार सचिन कल्याणशेट्टी यांनी दिली आहे. ज्या पाच गावांना इमारत बांधकामासाठी निधी मंजूर झालेले आहेत ती गावे आणि कंसात मंजूर झालेली रक्कम अशी आहे.अंकलगे (20 लाख),शावळ (20 लाख),भोसगे (20 लाख),संगदरी (20 लाख),तांदुळवाडी (25 लाख).
याबाबत अधिक माहिती अशी की राज्यातील ज्या ग्रामपंचायतींना स्वत:च्या कार्यालयासाठी स्वतंत्र इमारत नाही अशा ग्रामपंचायतींना स्वतंत्र कार्यालयाची इमारत बांधण्यासाठी “मा. बाळासाहेब ठाकरे स्मृती मातोश्री ग्रामपंचायत बांधणी योजना” संदर्भात शासन निर्णयान्वये मंजूर करण्यात आली आहे. ग्रामीण भागासाठी पायाभूत सुविधांची असणारी आवश्यकता व त्यासाठी उपलब्ध असणाऱ्या स्त्रोतांची मर्यादा विचारात घेऊन शासन निर्णयान्वये मा. बाळासाहेब ठाकरे स्मृती मातोश्री ग्रामपंचायत बांधणी योजनेच्या निधी निकषात बदल करुन मुदतवाढ देण्यात आली होती.त्यानुसार संदर्भाधीन पत्रान्वये प्राप्त प्रस्तावाच्या अनुषंगाने अक्कलकोट विधानसभेतील 5 ग्रामपंचायतींना स्वत:चे कार्यालय बांधण्यास मान्यता देण्याची बाब शासनाच्या विचाराधीन होती.
आमदार सचिन कल्याणशेट्टी यांच्या पाठपुराव्याने मंजूर झाल्याने या पाच ग्रामपंचायतींना गावाचा कारभार करण्यासाठी नजीकच्या काळात स्वतंत्र इमारत उपलब्ध होणार आहे.यासाठी मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, पालकमंत्री तथा ग्रामविकास मंत्री जयकुमार गोरे यांचे सहकार्य लाभले असे कल्याणशेट्टी यांनी स्पष्ट केले.
सचिन कल्याणशेट्टी आमदार, अक्कलकोट
ग्रामीण भागातील पायाभूत सुविधा आणखी मजबूत करण्यासाठी आणि गावचा कारभार करताना कोणतीही अडचण येऊ नये यासाठी पाठपुरावा करून सदर पाच ग्रामपंचायतींना एकूण एक कोटी पाच लाख रुपये मंजूर करण्यात आलेले आहेत.यामुळे या पाच ग्रामपंचायतिना आणखी चांगली सेवा देता येणार आहे.
