सोलापूर – राज्यातील कांद्याच्या विक्रमी उलाढालीसाठी प्रसिद्ध असलेल्या सोलापूर कृषी उत्पन्न बाजार समितीमध्ये गेल्या काही दिवसांपासून कांद्याची आवक आणि दर घसरल्याने शेतकऱ्यांमधून कांदा अनुदान देण्याची मागणी आता जोर धरू लागलेली आहे. बाजार समितीत गेल्या काही दिवसांपासून कांद्याची आवक कमी प्रमाणात येत होती. मात्र शनिवारी कांद्याची आवक वाढल्याचे चित्र दिसून आले. सुमारे २८० ट्रक कांदा विक्रीसाठी सोलापूर बाजार समिती दाखल झाला. मात्र हा सर्व कांदा परजिल्ह्यातील असून सोलापूर जिल्ह्यातील कांदा अद्याप विक्रीसाठी आलेला नसल्याचे अडत व्यापाऱ्यांनी सांगितले.
दरम्यान, अतिवृष्टी आणि महापुरामुळे शेतकरी बेहाल झाला आहे. अशा अवस्थेत शेतकऱ्यांना शासनाने आधार देणे गरजेचे आहे. सद्यस्थितीत सोलापूर जिल्ह्यातील अनेक कांदा लागवड क्षेत्र पाण्याखाली गेल्याने सोलापूर जिल्ह्यातील कांदा जवळपास नसल्यातच जमा आहे. त्यामुळे सोलापूर बाजार समितीमध्ये अहिल्यानगर, बीड, लातूर, नांदेड, पुणे जिल्ह्यातील कांदा विक्रीसाठी येत आहे. सर्वाधिक कांदा हा अहिल्यानगर जिल्ह्यातील असून येथील शेतकऱ्यांना सोलापूर बाजार समितीमध्ये वाढीव दर अपेक्षित असल्याने हजारो टन कांदा विक्रीसाठी आणला होता. परंतु, दर जैसे थेच असल्याने शेतकऱ्यांच्या पदरी निराशा पडली. त्यामुळे शेतकऱ्यांनी शासनाकडे आता कांदा अनुदानाची मागणी केली आहे.
वाढीव दराची अपेक्षा
कांदा लागवड क्षेत्र एक एकर असताना त्यासाठी सुमारे ८० ते ९० हजार रुपये खर्च येत आहे. मात्र मिळणारे उत्पन्न ६० ते ७० हजार रुपये इतके आहे. शेतकऱ्यांना प्रति एकरी २० रुपयांचा फटका बसत आहे. दर वाढले नसल्याने गेल्या पाच महिन्यांपासून कांद्याची साठवणूक केली होती. मात्र साठवणुकीतील कांदा खराब होत असल्याने विक्रीसाठी बाजारपेठेत आणला असता वाढीव दर अपेक्षित असताना तसा मिळाला नाही. दर वाढले पाहिजेत अशी मागणी आहे.
– विठ्ठल चितळकर, कांदा उत्पादक शेतकरी अहिल्यानगर
कांदा अनुदान गरजेचे
कांद्याचे दर सातत्याने घसरत आहेत. अशा परिस्थितीत कांदा अनुदान मिळणे गरजेचे आहे. मोठ्या प्रमाणात कांद्याचे लागवडी क्षेत्र असून त्यासाठी तितक्याच प्रमाणात खर्च येतो. मात्र उत्पन्न त्या पद्धतीने मिळत नसल्याने, खर्च वजा जाता शिल्लक उत्पन्न राहत नाही. त्यामुळे शेतकरी कर्जबाजारी होत आहे. अशा अवस्थेत सरकारने शेतकऱ्यांसाठी कांदा अनुदान जाहीर करणे गरजेचे आहे.
– बाळासाहेब वाघमोडे, कांदा उत्पादक शेतकरी मिरजगाव अहिल्यानगर
कांद्याची आवक वाढली दर मात्र जैसे थे
सोलापूर बाजार समितीमध्ये शनिवारी कांद्याची मोठी आवक झाली. मात्र कांद्याचे दर जैसे थेच होते.१२०० ते १६०० हा दर प्रतिक्विंटल कांद्याला मिळाला. चांगल्या दर्जाच्या कांद्याला १८०० रुपये इतका उच्च दर मिळाला. जागतिक बाजारपेठेत भारत सरकारने कांद्याच्या निर्यात शुल्काचे दर कमी जास्त केल्याने भारताच्या कांद्याची मागणी कमी झाल्याने खरेदीदार कांदा खरेदी करण्यात हात आकडा घेत आहेत.
– सादिक बागवान, अडते श्रीसिध्देश्वर सोलापूर बाजार समिती
श्री सिद्धेश्वर सोलापूर बाजार समितीमध्ये विक्रीसाठी आणलेला कांदा तर दुसऱ्या छायाचित्रात आपल्या कांद्याला लिलावात काय दर मिळतो याची प्रतीक्षा लावून बसलेला शेतकऱ्याचे टिपलेले हे छायाचित्र…
