मुंबई : ईव्हीम मशीन घोटाळ्याबरोबर राज्यातील मतदारयाद्यांतील घोटाळा, दुबार आणि बोगस मतदारांविरोधात महाविकास आघाडी, मनसे आणि इतर सर्वपक्षीय संघटना शनिवारी (1 नोव्हेंबर) मुंबईत राज्य निवडणूक आयोगाविरोधात सत्याचा मोर्चा निघणार आहे. दुपारी एक वाजता फॅशन स्ट्रीट येथून मोर्चाला सुरवात होणार असून त्यामध्ये जेष्ठ नेते शरद पवार यांच्यासह उद्धव व राज ठाकरे, काँग्रेसचे प्रदेशाध्यक्ष हर्षवर्धन सपकाळ यांच्यासह महाविकास आघाडीतील सर्व प्रमुख नेते सहभागी होणार आहेत.
आयोगाच्या पक्षपाती कारभाराविरोधात सर्वजण एकवटले असल्याचे यातून दाखवले जाणारा असून जोपर्यंत मतदार याद्या सदोष होत नाही तोपर्यंत स्थानिक स्वराज्य संस्थांच्या निवडणुका न घेण्याची मागणी त्यांच्याकडून करण्यात येत आहे.
निवडणूक आयोगावर दबाव वाढवण्याची रणनीती
या मोर्चात शिवसेना (ठाकरे गट), राष्ट्रवादी (शरद पवार गट), काँग्रेस आणि मनसेचा सहभाग आहे. महाविकास आघाडी आणि मनसे यांची एकमुखी मागणी आहे की, “जोपर्यंत मतदार याद्या स्वच्छ होत नाहीत, तोपर्यंत राज्यात निवडणुका घेऊ नयेत.” उद्याच्या मोर्चानंतर सर्व विरोधी पक्षांकडून एकत्रित घोषणा केली जाणार आहे. राज्य निवडणूक आयोगाने मतदार याद्यांमधील बोगस मतदार वगळेपर्यंत निवडणुका घेऊ नयेत, अन्यथा कोर्टात जाण्याचा पर्याय स्वीकारला जाईल.
———
न्यायालयात याचिका दाखल करणार
, विरोधी पक्षांकडून या मुद्द्यावर आता न्यायालयीन लढाई उभी करण्याची तयारी सुरू आहे. ठाकरे गटाच्या सूत्रांनी दिलेल्या माहितीनुसार, “मतदार याद्यांतील गोंधळ आणि बोगस मतदारांचा मुद्दा न्यायालयात नेऊन याचिका दाखल केली जाणार आहे.” तसेच, जोपर्यंत राज्य निवडणूक आयोग हे घोळ दूर करत नाही, तोपर्यंत निवडणुका घेऊ नयेत, अशी मागणी कोर्टात जाणार आहे. मागील सर्वपक्षीय बैठकीत तीन ते चार पर्यायांवर चर्चा झाली, त्यामध्ये न्यायालयात जाणं, निवडणुकांवर बहिष्कार टाकणं आणि निवडणूक आयोगावर सार्वजनिक दबाव आणणं हे पर्याय चर्चेत आले.
