सोलापूर – तडफदार पोलीस अधिकारी शर्मिष्ठा घारगे वालावलकर यांना केंद्रीय गृहमंत्री दक्षता पदक जाहीर झाले आहे. एका शिक्षण संस्थेतील 22 मुलींवर झालेल्या अत्याचार प्रकरणाला वाचा फोडणाऱ्या रणरागिणीचा गौरव होत आहे.
महाराष्ट्रात विविध ठिकाणी कार्यरत असताना उल्लेखनीय कामगिरी केल्याप्रकरणी धडाडीच्या पोलीस अधिकारी, पोलीस उपायुक्त शर्मिष्ठा घारगे वालावलकर यांना केंद्रीय गृहमंत्री दक्षता पदक जाहीर झाले आहे. यामुळे त्यांच्यावर सर्व स्तरातून कौतुकाचा वर्षाव होत आहे.
22 मुलींवर अत्याचार प्रकरणाचा भांडाफोड….
सांगली येथे पोलीस उपाधीक्षक पदावर कार्यरत असताना त्यांना एका शिक्षण संस्थेत 22 मुलींवर अत्याचार झाल्याचं निनावी पत्र मिळालं होतं. या प्रकरणाचा कसून तपास करत आरोपीला चार वेळा जन्मठेपेची शिक्षा लागेपर्यंत त्यांनी पाठपुरावा केला.
केंद्रीय गृहमंत्रालयाकडून पदकं जाहीर….
देशभरात सुरक्षेच्या दृष्टीने महत्त्वाच्या असलेल्या खात्यात कार्यरत असलेल्या व उल्लेखनीय कामगिरी करणाऱ्या अधिकारी-कर्मचाऱ्यांना केंद्रीय गृहमंत्रालयाने नुकतेच पदक जाहीर केली आहेत. महाराष्ट्रातील पाच अधिकाऱ्यांना हे पदक जाहीर झाले आहे.
२००६ सालच्या एमपीएससी अधिकारी…
छत्रपती संभाजीनगर शहरातील पोलीस उपायुक्त शर्मिष्ठा घारगे वालवलकर यांनाही केंद्रीय गृहमंत्री दक्षता पदक जाहीर झाले आहे. त्या २००६ सालच्या एमपीएससी उत्तीर्ण विद्यार्थिनी आहेत. २०१० पासून त्या पोलिस दलात विविध विभागांमध्ये कार्यरत आहेत.
किरण बेदींकडून प्रेरणा…
भारतातील पहिल्या महिला आयपीएस किरण बेदी यांच्याबद्दल वाचल्यानंतर शर्मिष्ठा यांनी बालपणीच पोलीस सेवेत येण्याचं स्वप्न पाहिलं. जेव्हा त्यांच्या शाळेत प्रमुख पाहुण्या म्हणून सांगलीच्या तत्कालीन पोलीस ऑफिसर रश्मी शुक्ला आल्या होत्या, तेव्हा त्यांच्या स्वप्नांनी आकार घेण्यास सुरुवात केली.
शर्मिष्ठा घारगे वालवलकर यांच्या आतापर्यंतच्या कारकीर्दीत सांगलीतील कामगिरी उल्लेखनीय ठरली. आश्रमशाळेत विद्यार्थिनींवर अत्याचार झाल्याचे निनावी पत्र मिळाल्यावर त्यांनी उपनिरीक्षक पल्लवी चव्हाण यांच्या मदतीने तपास सुरू केला.
आरोपीला चार वेळा जन्मठेप होण्याबाबत पाठपुरावा….
त्या आश्रम शाळेचा संस्थापक अध्यक्ष अरविंद पवार याच्याविरुद्ध भक्कम पुरावे सादर करत 22 मुलींच्या अत्याचार प्रकरणाचा भांडाफोड केला होता. शर्मिष्ठा वालवलकर या एवढ्यावरच थांबल्या नाहीत तर आरोपीला चार वेळा जन्मठेप होण्याबाबत पाठपुरावाही केला.
