माहूर / नांदेड – माहूर पोलीस ठाण्याच्या हद्दीत आतापर्यंत अनेक मास रेड कारवाया करण्यात आल्या असून,पोलीस निरीक्षक देविदास चोपडे यांना प्राप्त माहितीवरुन उपविभागीय पोलीस अधिकारी किरण भोंडवे यांच्या मार्गदर्शनाखाली सपोनि शरद घोडके यांनी आपल्या पथकासह आज शनिवारी सकाळी साडेनऊ ते साडेदहाच्या दरम्यान केलेल्या दोन मास रेड कारवाईत तालुक्यातील गुंडवळ तांडा येथे अवैध रित्या विक्रीसाठी साठवून ठेवण्यात आलेल्या देशी दारूच्या ३० बाटल्या जप्त केल्या तर गुंडवळच्या शेतशिवारातून ५०० लिटर मोहफुलाचे रसायण व साहित्य जप्त करत जागेवर नष्ट केले.
या दोन्ही प्रकरणी माहूर पोलीस ठाण्यात गुन्हा नोंदविण्याची प्रक्रिया सुरू आहे.
नांदेडचे पोलीस अधीक्षक अबिनाश कुमार यांच्या ‘ऑपरेशन फ्लॅश आऊट’ अंतर्गत जिल्हाभर मोठ्या प्रमाणावर कारवाई करण्यात येत आहे. या कारवाईमध्ये अवैध दारू, हातभट्टी, मटका जुगार आणि कोप्टा यांसारख्या अवैध व्यवसायांवर लक्ष केंद्रित केले गेले आहे. अवैध व्यवसाय समूळ नष्ट करणे,अवैध धंदे आणि गुन्हेगारी मोडून काढणे हा
या कारवाईचा मुख्य उद्देश आहे.आतापर्यंत जिल्हाभरात अनेक मास रेड कारवाया करण्यात आल्या.अनेक जणांवर विविध गुन्हे दाखल करण्यात आले. तर लाखो रुपयांचा मुद्देमाल जप्त करण्यात आला आहे.जिल्हा पोलीस अधीक्षकांच्या आदेशानुसार ठाणेदारांनी या कारवाया केल्या असून, याच मोहिमेअंतर्गत माहूर पोलीस ठाणे हद्दीतही अनेक ठिकाणी मास रेड छापा कारवाई करण्यात आली असून, हजारोंचा मुद्देमाल जप्त करत अनेकांवर गुन्हा नोंदविण्यात आला आहे.
याच मोहिमेअंतर्गत सपोनि शरद घोडके यांनी पोहेकॉ गजानन चौधरी, पोना प्रकाश गेडाम,पोकॉ पवन राऊत, मपोकॉ शिवनंदा जाधव, म.होमगार्ड देशमुख या पोलीस कर्मचाऱ्यांच्या पथकासह शनिवार दिनांक २९ नोव्हेंबर रोजी दोन ठिकाणी मास रेड छापा कारवाई केली.यामध्ये सकाळी ०९:३० वाजता गुंडवळ तांडा येथे मास रेड छापा टाकून अवैधरित्या विक्रीसाठी साठवून ठेवण्यात आलेल्या देशी दारूच्या ३० बाटल्या १२०० रुपये किंमतीच्या जप्त केल्या.तर दुसरा छापा गुंडवळ येथील शेतशिवारात टाकला असता याठिकाणी पोलीसांनी दारु बनविण्याचे ५०० लिटर मोहफुलाचे रसायण व साहित्य किंमत २५००० रुपये जप्त करून ते जागेवर नष्ट केले.
नांदेड जिल्हा पोलीस अधीक्षक अबिनाश कुमार यांच्या ऑपरेशन फ्लॅश आऊट अंतर्गत जिल्हाभरात मोठ्या प्रमाणावर एकाचवेळी अनेक ठिकाणी छापे टाकून गुन्हेगारी नेटवर्क किंवा बेकायदेशीर कामांना मोठा धक्का देण्याच्या मुख्य उद्देशाने ऑपरेशन फ्लॅश आऊट अंतर्गत मास रेड कारवाई करण्यात येत असून,माहूर पोलीस ठाण्याच्या हद्दीतील व अवैध दारू निर्मिती, अवैध दारू विक्री व इतर गंभीर गुन्हे रोखणे या उद्देशाने वरीष्ठांच्या मार्गदर्शनाखाली पोलीस निरीक्षक देविदास चोपडे यांनी अवैध व्यवसायांवर कारवाईचा बडगा उचलला असून,त्याचा घणाघाती प्रहार आज त्यांनी गुंडवळ तांडा व गुंडवळ शेत शिवार या दोन ठिकाणी मास रेड करत अवैध व्यवसायिकांना यातून सावधानतेचा कडक इशारा दिला आहे.
