सोलापूर : वजन काट्यांची तपासणी करून प्रमाणपत्र देण्यात आले असून ते डिसेंबर २०२५ पर्यंत वैध आहे. पुढील प्रमाणपत्र देण्यापूर्वी पोलीस अहवाल व मनपाचे ना-हरकत प्रमाणपत्र आवश्यक राहील तसेच
शहरातील अनधिकृत खोक्यांमुळे वाहतूक अडथळे निर्माण होत असल्याने त्या ठिकाणांची यादी चार दिवसांत मनपा अतिक्रमण नियंत्रण विभागाकडे सादर करण्याचा निर्णय महापालिका आयुक्त डॉ. सचिन ओम्बासे यांच्या अध्यक्षतेखाली झालेल्या बैठकीत घेण्यात आला.
सोलापूर महानगरपालिकेच्या वतीने आज सोलापूर-हैद्राबाद महामार्गावरील जुने विडी घरकुल वळण परिसरातील वजन काटे, अतिक्रमण आणि वाहतूक व्यवस्थापनासंदर्भात आढावा बैठक महापालिका आयुक्त डॉ. सचिन ओम्बासे यांच्या अध्यक्षतेखाली घेण्यात आली.
या बैठकीस सहाय्यक पोलीस आयुक्त (वाहतूक) सुधीर खिरडकर,अतिक्रमण विभागाचे नियंत्रण अधिकारी तपन डंके, विभागीय अधिकारी रऊफ सरकाजी, माजी नगरसेवक विठ्ठल कोटा, कृषी उत्पन्न बाजार समितीचे प्र. सचिव अतुलसिंग राजपूत, उपनियंत्रक अ.ध. गेटमे, चंदन काटा चालक/मालक नविन सोनीमिंदे , प्रविण साका, रियाज मोमीन, भास्कर मरगल आदी पोलीस विभाग, वैधमापनशाळा, कृषी उत्पन्न बाजार समिती आणि राष्ट्रीय महामार्ग प्राधिकरण (NHAI) यांचे अधिकारी उपस्थित होते.
या बैठकीत सहाय्यक पोलीस आयुक्त (ट्रॅफिक) सुधीर खिरडकर म्हणाले, चंदन काटा परिसरातील सर्व्हिस रोडवर जड वाहने उभी केल्याने पादचारी मार्ग अडवला जातो आणि वाहतूक कोंडी निर्माण होते. त्यामुळे गेल्या काही वर्षांपासून वारंवार अपघातांच्या घटना घडत आहेत. यावर उपाययोजना म्हणून तीन दिवसांत अपघातांचा अहवाल, दंड आकारणीची माहिती आणि संबंधित छायाचित्रे सादर करण्याचे निर्देश आयुक्तांनी दिले.
वैधमापनशाळा उपनियंत्रक अ.ध. गेटमे यांनी सांगितले की, चंदन काटा येथील वजन काट्यांची तपासणी करून प्रमाणपत्र देण्यात आले असून ते डिसेंबर २०२५ पर्यंत वैध आहे. तथापि, पुढील प्रमाणपत्र देण्यापूर्वी पोलीस अहवाल व मनपाचे ना-हरकत प्रमाणपत्र आवश्यक राहील, असे त्यांनी स्पष्ट केले.
बैठकीत समर्थ मेडिकल स्टोअर परिसरातील ‘एल’ आकाराच्या रस्त्यांवर उभी राहणारी वाहने व अपघातांच्या घटनांबाबतही चर्चा झाली. शाळकरी विद्यार्थ्यांच्या सुरक्षेच्या दृष्टीने राष्ट्रीय महामार्ग प्राधिकरण कडून सर्व्हिस रोड आणि डिव्हायडरची दुरुस्ती तातडीने करण्याच्या सूचना देण्यात आल्या.
कृषी उत्पन्न बाजार समितीच्या प्रतिनिधींनी सांगितले की, बाजार समितीच्या हद्दीतच दोन वजन काटे कार्यरत असल्याने बाहेरील काट्यांची गरज नाही. त्यामुळे बाजार परिसरातील वाहतूक अधिक सुलभ होईल, असे त्यांनी नमूद केले.
शहरातील अनधिकृत खोक्यांमुळे वाहतूक अडथळे निर्माण होत असल्याचे पोलिसांनी निदर्शनास आणले. या संदर्भात अडथळा निर्माण करणाऱ्या ठिकाणांची यादी चार दिवसांत मनपा अतिक्रमण नियंत्रण विभागाकडे सादर करण्याचे निर्देश देण्यात आले.
मुदतीत अहवाल सादर करून आवश्यक कार्यवाही करावी : आयुक्त डॉ. ओम्बासे
बैठकीच्या शेवटी आयुक्त डॉ. सचिन ओम्बासे यांनी सर्व विभागांना ठरवलेल्या मुदतीत अहवाल सादर करून आवश्यक कार्यवाही हाती घेण्याचे स्पष्ट निर्देश दिले. सोलापूर शहरातील वाहतूक सुसूत्रता, नागरिकांची सुरक्षितता आणि अतिक्रमण निर्मूलनासाठी मनपा प्रशासन व पोलीस विभाग संयुक्तपणे कार्य करणार असल्याचेही त्यांनी सांगितले.
