सोलापूर : महापालिका निवडणूक प्रक्रियेत पारदर्शकता, निष्पक्षता व कायदेशीर नियमांचे पालन अत्यंत महत्त्वाचे आहे. महाराष्ट्र महानगरपालिका अधिनियम १९४९ व राज्य निवडणूक आयोगाच्या सर्व मार्गदर्शक सूचनांचे काटेकोर पालन करावे. निवडणूक काळात आचारसंहिता भंगाच्या तक्रारींवर तातडीने कार्यवाही करणे, राजकीय पक्ष व उमेदवारांशी समन्वय राखणे तसेच कोणत्याही प्रकारचा निष्काळजीपणा खपवून घेतला जाणार नाही, असे आदेश निवडणूक निर्णय अधिकारी तथा मनपा आयुक्त डॉ. सचिन ओम्बासे यांनी दिले.
सोलापूर महानगरपालिका सार्वत्रिक निवडणूक २०२५ च्या निमित्ताने आज सोलापूर महानगरपालिकेचे आयुक्त तथा निवडणूक अधिकारी डॉ. सचिन ओम्बासे यांच्या अध्यक्षतेखाली आयुक्त कार्यालयात निवडणूक निर्णय अधिकारी व सहाय्यक (सह) निवडणूक निर्णय अधिकाऱ्यांची आढावा बैठक झाली. या बैठकीत निवडणूक कार्यक्रमाची अंमलबजावणी, नामनिर्देशन प्रक्रिया, छाननी, उमेदवारी माघार, मतदान व्यवस्थापन, मतमोजणी प्रक्रिया तसेच निवडणूक आचारसंहितेची काटेकोर अंमलबजावणी याबाबत सविस्तर चर्चा करण्यात आली. प्रत्येक निवडणूक निर्णय अधिकारी व सहाय्यक अधिकाऱ्यांना त्यांच्या प्रभागनिहाय जबाबदाऱ्या स्पष्टपणे सांगण्यात आल्या. सोलापूर महानगरपालिका सार्वत्रिक निवडणूक शांततापूर्ण, निर्भय व विश्वासार्ह वातावरणात पार पाडण्यासाठी प्रशासन सज्ज असल्याचे यावेळी स्पष्ट करण्यात आले.
यावेळी अतिरिक्त आयुक्त वीणा पवार, अतिरिक्त आयुक्त संदीप कारंजे,उपायुक्त आशिष लोकरे, मुख्य लेखा अधिकारी डॉ. रत्नराज जवळगेकर, उपजिल्हाधिकारी, रो.ह.यो अंजली मरोड,उपजिल्हाधिकारी, भूसंपादन अभिषेक देशमुख,उपविभागीय अधिकारी सोलापूर सदाशिव पडदुणे, उपविभागीय अधिकारी, भैरप्पा माळी,उपविभागीय अधिकारी, विजया पांगारकर, उपविभागीय अधिकारी सचिन इथापे,उपविभागीय अधिकारी, जयश्री आव्हाड , सहायक आयुक्त गिरीष पंडित, निवासी नायब तहसीलदार राजाभाऊ भंडारे, नायब तहसीलदार सुधाकर दाहिजे , नायब तहसीलदार शितल कन्हेरे, नायब तहसीलदार विकास पवार,
नगर अभियंता सारिका अक्कूलवार आणि संबंधित अधिकारी उपस्थिती होते.
