.
खामसवाडी / धाराशिव – गडपाटी, धाराशिव येथील आर.पी. औषध निर्माणशास्त्र महाविद्यालयामध्ये औषधनिर्माणशास्त्र व लाईफ सायन्सच्या विद्यार्थ्यांसाठी डॉ. प्रतापसिंह पाटील यांच्या मार्गदर्शनाखाली मेडिकल ट्रेनिंग अँड प्लेसमेंट हब’ सुरू होत आहे. या हबमुळे ग्रामीण भागातील विद्यार्थ्यांना जागतिक स्तरावरील रोजगाराच्या संधी उपलब्ध होणार आहेत.
आर. पी. औषधनिर्माण शास्त्र महाविद्यालय आणि सह्याद्री सॉफ्टवेअर, पुणे व हैदराबाद यांच्यामध्ये नुकताच एक महत्त्वाचा संयुक्त करार झाला असून या दोघांच्या संयुक्त विद्यमाने महाविद्यालयात लवकरच ‘मेडिकल कोडिंग’च्या अद्ययावत प्रशिक्षणाची लॅब सुरू केली जाणार आहे.
या लॅबच्या माध्यमातून जगभरातील अद्ययावत मेडिकल कोडिंग तंत्रज्ञान ग्रामीण भागातील विद्यार्थ्यांसाठी उपलब्ध करून त्याचे विशेष प्रशिक्षण देण्यात येईल. त्यामुळे येथील विद्यार्थ्यांसाठी रोजगाराच्या वेगवेगळ्या संधींची द्वारे खुली होतील हे विशेष.!
महाविद्यालयात झालेल्या या बैठकीमध्ये सह्याद्री सॉफ्टवेअर, पुणे व हैदराबादचे इन्चार्ज शार्दुल भोसले यांनी विद्यार्थ्यांना मेडिकल कोडिंग फार्माकोव्हिजिलन्स तसेच ॲडव्हर्स ड्रग रिपोर्टिंग आणि त्या संदर्भातील सॉफ्टवेअर विषयी सखोल मार्गदर्शन केले.
तसेच सह्याद्री सॉफ्टवेअर पुणे व हैदराबादचे प्रोजेक्ट कॉर्डिनेटर अतिश जाधव यांनी विद्यार्थ्यांना नोकरी मिळवताना येणाऱ्या अडचणींविषयी विस्तृत मार्गदर्शन केले. सदरील बैठकीमध्ये महाविद्यालयाचे प्राचार्य डॉ.शेख गाझी यांनीही विद्यार्थ्यांना संधीचा लाभ घेण्याचे आवाहन केले.
या कार्यक्रमाला बी.फार्मसी तिसऱ्या वर्षाचे व अंतिम वर्षाचे विद्यार्थी मोठ्या प्रमाणात उपस्थित होते. कार्यक्रमाचे समन्वयक म्हणून महाविद्यालयाचे प्लेसमेंट इन्चार्ज प्राध्यापक विजय सुतार यांनी काम पाहिले.
