पंढरपूर – अलंकापूरी आळंदी येथे कैवल्य साम्राज्य श्रीसंत ज्ञानेश्वर महाराजांचा संजीवन समाधी सोहळा साजरा करून परतीच्या दिशेने निघालेल्या संत नामदेव महाराज पालखी सोहळ्याचे शनिवारी पंढरीनगरीत आगमन झाले.
उत्पत्ती एकादशी (शनिवार दि. १५ नोव्हेंबर ) रोजी व सोमवार (दि.१७ नोव्हेंबर ) रोजी आळंदी येथे संत ज्ञानेश्वर महाराजांचा संजीवन समाधी सोहळा साजरा झाला. या सोहळ्यासाठी संत-महंतांच्या पालख्यांसह लाखो भाविक आळंदीत दाखल झाले होते. अमावस्येपर्यंत पालखी सोहळ्यांचा मुक्काम आळंदी येथील श्री विष्णु मंदिर येथे होता. गुरुवार दि.२० नोव्हेंबर रोजी अमावस्येनिमित्त काल्याचा कार्यक्रम झाल्यानंतर संतांच्या पालखी सोहळ्यांनी परतीच्या दिशेने प्रवास सुरु केला.
दरम्यान शनिवार दि.२९ नोव्हेंबर, मार्गशीर्ष शु. ९ दिवशी पालखी सोहळ्यांचे दुपारी चार वाजता इसबावी येथील विसावा मंदिराजवळ आगमन झाले. याठिकाणी महाराज मंडळी, मानकरी व नागरिकांनी दर्शन घेवून पालखी सोहळ्याचे स्वागत केले. याठिकाणी अभंग व आरती करण्यात आली. पालखी रथ फुलांनी सजविण्यात आला. त्यानंतर शाही लवाजम्यासह सनई-चौघड्याच्या निनादात, ज्ञानोबा-तुकाराम, नामदेव-जनाबाईचा गजर करत पालखी सोहळा कर्मवीर भाऊराव पाटील महाविद्यालय, सरगम चौक, भोसले चौक, भादुले चौक, महाद्वार यामार्गे संत नामदेव पायरी येथे आला. यावेळी अभंग, आरती करण्यात आली. त्यानंतर पालखी सोहळा संत नामदेव मंदिरात विसावला. नामदास परिवारातील सुवासिनी महिलांनी पालखीचे औक्षण केले. याठिकाणी श्री केशवराज, संत नामदेव-जनाबाई यांची आरती झाल्यानंतर मानकर्याना श्रीफळ प्रसाद देण्यात आला.
पालखी सोहळा यशस्वी होण्यासाठी ह.भ.प. माधव महाराज, मुकुंद महाराज, केशव महाराज, कृष्णदास महाराज, ज्ञानेश्वर महाराज नामदास यांच्या मार्गदर्शनाखाली एकनाथ महाराज, विठ्ठल महाराज, हरि महाराज, निवृत्ती महाराज, मुरारी महाराज, केदार महाराज, भावार्थ महाराज, आदित्य महाराज यांच्यासह नामदास महाराज परिवार व फडकर्यांनी परिश्रम घेतले.
———————
वारकऱ्यांना अल्पोपहाराचे वाटप –
संत नामदेव महाराज पालखी सोहळ्यातील वारकर्यां ना क्रांतीसिंह नाना पाटील चौक येथे संत नामदेव शिंपी समाज, युवक संघटनेच्या वतीने चहा व अल्पोपहाराचे वाटप करण्यात आले. यावेळी शिंपी समाजाचे अध्यक्ष अध्यक्ष गणेश उंडाळे, विश्वस्त राजेश धोकटे, संजय चांडोले, जयवंत कांबळे, सेवक राजाभाऊ जवंजाळ, बाळासाहेब चांडोले, गोविंद वेल्हाळ, रत्नाकर पिसे यांच्यासह वारकरी, समाज बांधव उपस्थित होते.
