धाराशिव – स्व. हिंदूहृदयसम्राट बाळासाहेब ठाकरे स्वच्छ व सुंदर व स्थानक अभियानांतर्गत मूल्यमापन समितीने धाराशिव बस स्थानकाला दि.२७ नोव्हेंबर रोजी भेट दिली. यावेळी मुंबई प्रदेशच्या प्रादेशिक व्यवस्थापक चेतना खिरवाडकर, मुंबई प्रदेशचे प्रादेशिक अभियंता विवेक लाेंढे, धाराशिवचे विभाग नियंत्रक अजय पाटील, प्रभारी विभागीय वाहतूक अधिकारी संतोष कोष्टी, धाराशिवचे आगार व्यवस्थापक बालाजी भांगे, धाराशिव आगाराचे वाहतूक निरीक्षक काझी याहीया अहेमद सुहेल अहेमद, सहा. वाहतूक अधिकारी मु.रा. कोमटवार, प्रवाशी मित्र राठीं आदींसह एसटी विभागाचे अधिकारी व कर्मचारी होते.
यावेळी मूल्यमापन समितीने धाराशिव बस स्थानकातील स्वच्छता, सुंदरीकरण, प्रवाशांसाठी असलेले सुलभ शौचालय, स्तनदा मातांच्या हिरकणी कक्ष, पिण्याचे पाणी, प्रवाशांना दिल्या जाणाऱ्या इतर सोयी सुविधांची पाहणी करून मूल्यमापन केले. तसेच त्यांनी प्रवाशांशी संवाद साधून बसेस वेळेवर सुटतात का ? विद्यार्थ्यांसह इतर प्रवाशांशी संवाद साधला.
स्व.बाळासाहेब ठाकरे स्वच्छ व सुंदर व बस स्थानक अभियानांतर्गत मूल्यमापन समितीकडून तपासणीचा तिसरा टप्पा सुरु आहे. त्यामुळे दि.२७ नोव्हेंबर रोजी जिल्ह्यातील उमरगा, तुळजापूर बस स्थानकांची पाहणी करुन ४ वाजण्याच्या दरम्यान समिती धाराशिव बस स्थानकात पोहचली. एसटीच्या राज्यभरातील सर्व बस स्थानकावर हिंदु हृदयसम्राट स्व बाळासाहेब ठाकरे स्वच्छ, सुंदर बस स्थानक अभियान राबवण्यात येत आहे. या अभियानांतर्गत ३ कोटी रुपयांची बक्षिसे दिली जाणार आहेत. राज्यात “अ’ वर्ग दर्जा प्राप्त पहिला क्रमांक येणाऱ्या बस स्थानकास १ कोटींचे बक्षीस जाहीर केले आहे.
यानिमित्त बस स्थानकात शालेय विद्यार्थी, सामाजिक संस्था व एसटी कर्मचाऱ्यांच्या सहकार्यातून स्वच्छता मोहीम राबवण्यात येत आहे. सर्वसामान्य प्रवाशांना स्वच्छ व सुंदर बसस्थानक तसेच निर्जंतुक, टापटीप प्रसाधनगृहे कायमस्वरुपी उपलब्ध करून देणे हे एस. टी.चे प्राधान्य असल्याची माहिती खिरवाडकर यांनी सांगितली.
हिंदूहृदय सम्राट बाळासाहेब ठाकरे स्वच्छ व सुंदर व बस स्थानक’ अभियान अंतर्गत मूल्यमापन समिती प्रमुख तथा मुंबई प्रदेशच्या प्रादेशिक व्यवस्थापक खिरवाडकर, मुंबई प्रदेशचे प्रादेशिक अभियंता लाेंढे यांनी धाराशिव बस स्थानकातील झालेल्या बदलाचे कौतुक करुन लांब पल्याच्या मार्गावरील कामांच विशेष कौतुक केले.
बस स्थानकात खासगी वाहतूक वाहन आल्यास कारवाई –काझी याहीया आगार वाहतूक निरीक्षक
प्रवाशांची संख्या वाढलेली असल्यामुळे खाजगी वाहतूकदार त्यांच्या खाजगी वाहनाने संबंधित प्रवाशांना त्यांच्या गावी नेण्यासाठी प्रयत्न करीत आहेत. मात्र, प्रवाशांची गैरसोय होऊ नये यासाठी धाराशिव आगाराने पुणे, लातूर, सोलापूरसह विविध मार्गावर जादा बर्सेस सोडल्या आहेत. पुण्यासाठी २० जादा बस सोडल्या आहेत. तर सुरक्षित प्रवासासाठी प्रवाशांची एसटी बसलाच पसंती आहे.
बस स्थानकात खासगी वाहनांना प्रवेश बंदी केली आहे. जर खाजगी वाहनधारकांनी बस स्थानकात येऊन येथील प्रवाशांना आमिष दाखवण्याचा प्रयत्न केला तर त्यांच्यावर थेट कारवाई करणार असल्याचा इशारा धाराशिव आगाराचे वाहतूक निरीक्षक काझी याहीया यांनी दिला आहे.
