पंढरपूर – राष्ट्रीय स्वयंसेवक संघाचे राष्ट्रीय पातळीवरील ज्येष्ठ मागदर्शक सदाशिव उर्फ सदुभाऊ देवधर यांची सोलापूर तरुण भारतचे संपादक प्रशांत माने यांनी शुक्रवारी (ता.२८) येथील त्यांच्या निवासस्थानी सदिच्छा भेट घेतली. या भेटीत राष्ट्रीय स्वयंसेवक संघाच्या शंभर वर्षाच्या कारकिर्दीवर चर्चा झाली. या चर्चेदरम्यान या शंभर वर्षाच्या कार्यकाळातील काही जुन्या आठवणींना श्री.देवधर यांच्याकडून यावेळी उजाळा देखील देण्यात आला.
यावेळी श्री.देवधर यांनी राष्ट्रीय स्वयंसवेक संघातील आपल्या सुरुवातीच्या काळा पासून ज्या ज्या ठिकाणी सेवाकार्य करण्याची संधी त्या त्या भागाची आणि त्या त्या काळात ज्या ज्या महान व्यक्तींचा त्यांना सहवास मिळाला त्या बद्दलची सविस्तर माहिती यावेळी सांगितली. श्री.देवधर यांची अत्यंत साधी राहणी, केलेल्या कामा बद्दलचा कोणताही अहंमभाव नाही. या बरोबरच संघाबद्दलची त्यांची निष्ठा, आत्मियता, प्रेम तसेच या वयात देखील त्यांची असलेली तल्लखबुध्दी आणि त्यांच्याकडे असलेला सखोल माहिती कथन केली.
राष्ट्रीय स्वयंसेवक संघाचे राष्ट्रीय पातळीवरील ज्येष्ठ मार्गदर्शक सदुभाऊ देवधर हे वृध्दापकाळाने आता पंढरपूर येथील निवासस्थानीच वास्तव्यास असतात. वृध्दापकाळ आणि तब्येतीच्या कारणामुळे पहिल्या सारखे झोकून देवून कार्य आता त्यांच्या हातून होत नाही. मात्र संघा बद्दल असलेली तळमळ आज देखील त्यांना निवांत बसु देत नाही. संघाच्या रोजच्या घडामोडीची माहिती आज देखील श्री.देवधर हे नियमितपणे घेत असतात. संपुर्ण हिंदस्थानभरातून वास्तव्यास असलेले भारतीय जनता पार्टी तसेच राष्ट्रीय स्वयंसंघाचे अनेक जुने,जाणते पदाधिकारी तसेच विद्यमान पदाधिकारी आणि कार्यकर्ते श्री.देवधर यांची भेट घेण्यासाठी आवर्जुन पंढरपूर येथे त्यांच्या निवासस्थानी येत असतात. या भेटी दरम्यान त्यांच्याकडून मागदर्शनासह काही जुनी माहिती देखील आवर्जुन जाणून घेत असतात. मध्यंतरीच्या काळात देशाचे पंतप्रधान नरेंद्र मोदी यांनी देखील श्री.देवधर यांना दिल्ली येथे खास निमंत्रण पाठवुन बोलावून घेऊन आवर्जुन त्यांची भेट घेतली होती. या भेटी दरम्यान पंतप्रधानांनी श्री.देवधर यांच्या तब्येतीची विचारपूस करुन त्यांच्या बरोबर विविध विषयावर चर्चा देखील केलेली होती.
दरम्यान अशा या महान व्यक्तीच्या भेटीमुळे आपण धन्य झाल्याची भावना यावेळी तरुणभारतचे संपादक प्रशांत माने यांनी श्री.देवधर यांचे चरणस्पर्श करुन दर्शन घेत व्यक्त केली. यावेळी संपादक श्री.माने यांनी श्री. देवधर यांना सोलापूर येथील दैनिक तरुण भारतच्या नवीन प्रिटिंगप्रेस आणि नव्या वास्तुतील कार्यालयास आवर्जुन भेट देण्याचे निमंत्रण देखील दिले.
श्री.देवधर यांच्या या सदिच्छा भेटीवेळी संपादक श्री.माने यांच्यासोबत सोलापूर तरुणभारतचे विपणन विभागाचे मुख्य प्रबंधक मनोहर बायनी, वितरण विभागाचे प्रमुख श्री.शिवशरण, पंढरपूर विभागाचे प्रतिनिधी महेश भंडारकवठेकर तसेच पंढरपूर येथील तरुणभारत वृत्तपत्राचे एजंट संतोष कुलकर्णी आदी उपस्थित होते.
————————
राष्ट्रयज्ञ के शंभर वर्षे या विशेषांकाचे देवधर यांच्या कडून कौतूक –
राष्ट्रीय स्वयंसेवक संघ आपली शंभर वर्षाची वाटचाल पुढच्या वर्षी पुर्ण करीत आहे. यावेळी राष्ट्रीय स्वयंसेवक संघाच्या या शंभर वर्षाच्या वाटचालीवर प्रकाश टाकणाऱ्या दैनिक सोलापूर तरुण भारत कडून नुकताच प्रसिध्द करण्यात आलेल्या राष्ट्रयज्ञ के शंभर वर्षे हा विशेषांक श्री.देवधर यांना भेट देण्यात आला. यावेळी श्री.देवधर यांनी या विशेषांकांची कुतुहलाने पाहणी करुन या विशेषांकाच्या निर्मिती बद्दल सोलापूर तरुण भारत व्यवस्थापनास धन्यवाद दिले.




















