सोलापूर : महानगरपालिका सार्वत्रिक निवडणूक २०२५–२६ अंतिम टप्प्यात दाखल झाली असून, निवडणूक प्रक्रिया पारदर्शक, सुरक्षित व सुरळीत पार पाडण्यासाठी प्रशासन पूर्णतः सज्ज झाले आहे. या पार्श्वभूमीवर महापालिका आयुक्त तथा निवडणूक निर्णय अधिकारी डॉ. सचिन ओम्बासे यांनी मतदान यंत्र वितरण केंद्र, स्ट्रॉंग रूम तसेच मतमोजणी केंद्रांची प्रत्यक्ष पाहणी केली.
पाहणीदरम्यान मतदान यंत्रांचे वितरण ऑन-कॅमेरा पद्धतीने व कडक पोलीस बंदोबस्तात होत असल्याची खातरजमा करण्यात आली. स्ट्रॉंग रूममधील सीसीटीव्ही निगराणी, सीलिंग प्रक्रिया, प्रवेश-निर्गमन नियंत्रण व २४ तास सुरक्षा व्यवस्था याबाबत त्यांनी सविस्तर माहिती घेतली. तसेच मतमोजणी केंद्रांवरील बैठक व्यवस्था, वीजपुरवठा, अग्निसुरक्षा, सीसीटीव्ही यंत्रणा व कर्मचाऱ्यांची नियुक्ती यांचाही आढावा घेण्यात आला.
निवडणूक प्रक्रियेतील प्रत्येक टप्पा नियमानुसार, दक्षतेने व पारदर्शकपणे राबविण्याचे निर्देश देत डॉ. ओम्बासे यांनी सुरक्षा व्यवस्थेला सर्वोच्च प्राधान्य देण्यावर भर दिला.
भारत व राज्य निवडणूक आयोगाच्या मार्गदर्शक सूचनांचे काटेकोर पालन करण्याचे निर्देश त्यांनी संबंधित यंत्रणांना दिले.सोलापूर महानगरपालिका निवडणूक शांततेत, निर्भय व निष्पक्ष वातावरणात पार पाडण्यासाठी प्रशासन पूर्णतः सज्ज असल्याचा विश्वास आयुक्त डॉ. सचिन ओम्बासे यांनी व्यक्त केला.
यावेळी निवडणूक निर्णय अधिकारी, महापालिकेचे वरिष्ठ अधिकारी व पोलीस प्रशासन उपस्थित होते.
