अ.नगर : राष्ट्रीयकृत बँकांमध्ये अग्रगण्य असलेल्या सेंट्रल बँक ऑफ इंडियाच्या वतीने देशभरात क्रेडिट आऊटरिच अभियानाचे आयोजन करण्यात येत आहे.
त्याचाच एक भाग म्हणून बँकेच्या अहिल्यानगर क्षेत्रीय कार्यालयाने आयोजित केलेल्या रिटेल ऋण आऊटरिच अभियानास ग्राहकांचा उत्तम प्रतिसाद मिळाला असल्याची माहिती बँकेचे क्षेत्रीय प्रमुख राजीव नयन यांनी दिली.
या अभियानास अहिल्यानगर शहर विभागाचे अपर तहसीलदार स्वप्निल ढवळे, क्रेडाईचे उपाध्यक्ष तथा स्पेस कन्स्ट्रक्शनचे अमित वाघमारे, क्रेडाईचे सेक्रेटरी तथा आदिराज कन्स्ट्रक्शनचे दीपक बांगर, कृष्णा कन्स्ट्रक्शनचे शिवाजी डोके, लेवलअप कन्स्ट्रक्शनचे योगेश परमानी यांसह विविध क्षेत्रातील मान्यवर उपस्थित होते.
यावेळी उपस्थितांना मार्गदर्शन करताना राजीव नयन म्हणाले की, सामान्य जनतेसाठी ( रिटेल ) असलेल्या बँकेच्या विविध कर्ज योजना व सुविधांची माहिती सर्वांपर्यंत पोहोचावी या दृष्टिकोनातून या रिटेल ऋण आऊट रीच अभियानाचे आयोजन करण्यात आले असून आजच्या अभियानात १२.५ कोटींचे विविध प्रकारचे कर्ज मंजूर करण्यात आले आहे. त्यांचे मंजूरी पत्र मान्यवरांच्या हस्ते कर्जदारांना वितरीत करण्यात आले. दोन वाहन विक्रेत्यांशी व एका बांधकाम व्यावसायिकाशी आजच्या अभियानात टाय अप करण्यात आले.
सेंट्रल बँक ग्राहकांच्या सर्वांगिण प्रगतीसाठी कटिबद्ध असून बँकेच्या ग्राहकाभिमुख विविध योजनांचा लाभ जनतेने घ्यावा
असे आवाहन यावेळी श्री नयन यांनी केले.
प्रमुख अतिथी तहसीलदार स्वप्निल ढवळे म्हणाले की, सेंट्रल बँक ऑफ इंडिया ही जिल्ह्याची लीड बँक असल्याने जिल्हा प्रशासनाच्या दैनंदिन कामकाजात बँकेचा सक्रिय सहभाग असतो. माझ्या जीवनाच्या यशस्वी वाटचालीमध्ये सेंट्रल बँक ऑफ इंडियाचे मोलाचे योगदान असल्याची भावना यावेळी श्री ढवळे यांनी व्यक्त केली.
रिटेल – आर ए सी मॅनेजर सागर तनपुरे यांनी उपस्थित यांना स्लाईड शो मार्फत बँकेच्या विविध कर्ज योजनांची माहिती दिली.
चिचोंडी पाटील शाखेचे प्रबंधक मयूर जामगावकर यांनी आपल्या खास शैलीमध्ये सूत्रसंचालन तर केलेच त्याच बरोबर उपस्थित ग्राहकांना त्यांच्या प्रश्नांची समर्पक उत्तरे देखील दिली.
यावेळी सेंट्रल बँक ऑफ इंडियाच्या शहर शाखेचे प्रबंधक गुलजानन गोहेर, सावेडी शाखेचे शशांक नवले, एमआयडीसी शाखेचे सुनील विधाते यांसह विविध क्षेत्रातील मान्यवर, शाखा प्रबंधक, अधिकारी व कर्मचारी उपस्थित होते.
