मंगळवेढा – अतिक्रमण तात्काळ हटविण्याची आगारप्रमुखांची मागणी मंगळवेढा बसस्थानकाच्या दोन्ही गेटच्या बाजूला अतिक्रमणाने घेरले असून एस.टी. बस आगारात येताना व बाहेर जाताना याचा नाहक त्रास वाहन चालकांना होत असून हे अतिक्रमण तात्काळ हटवावे अशी मागणी मंगळवेढ्याचे आगारप्रमुख संजय भोसले यांनी नगरपालिकेचे मुख्याधिकारी यांच्याकडे लेखी स्वरुपात केली आहे.
मंगळवेढा बसस्थानकाच्या दोन्ही गेटला चहाच्या टपर्या,मटक्याच्या टपर्या व इतर टपर्या असून या चहाच्या टपर्यामध्ये सिलेंडर गॅसचा वापर केला जातो. बस बाहेर जाताना व आत येताना या अनाधिकृत टपर्यामुळे वाहन चालकाला मोठी कसरत करत वाहन वळवावे लागत असून यावेळी रस्त्यावर वाहतूकीची कोंडीही होवून लांबलचक वाहनाच्या रांगा लागत आहेत.
वारंवार होणार्या या घटनेमुळे बसचालक त्रस्त झाले आहेत. दिवसभरात जवळपास 100 बससेच्या फेर्या होत आहेत. इन गेटच्या आत प्रवाशांना बसण्यासाठी निवाराशेड बांधण्यात आले असून त्यांच्या सोयीसाठी बाकडेही ठेवण्यात आले आहे.
परंतू निवारा शेड शेजारीच टपरी धारकांनी टपर्या टाकून अतिक्रमण केले आहे. या सर्व अतिक्रमणांची आत्तापर्यंत एक डझन तक्रारी नगरपालिकेकडे करुनही अतिक्रमण काढले जात नाही. या तक्रारीची माहितीसाठी प्रत पोलीस प्रशासनाकडेही पाठविण्यात आली आहे. यांचेही डोळेझाक होत असल्याचे म्हटले आहे. दरम्यान मुख्याधिकारी यांनी तात्काळ दखल घेवून आगाराच्या गेट जवळ दोन्ही बाजूला असलेलेअनाधिकृत अतिक्रमण तात्काळ हटावावे अन्यथा आंदोलन छेडण्याचा इशारा कर्मचार्यांनी दिला आहे.
