मुंबई – राज्यात महाविकास आघाडी अस्तित्वात आल्यापासून एकहाती किल्ला लढविणाऱ्या त्यातही विशेषत: उद्धव ठाकरे गटाची भूमिका आक्रमकपणे मांडीत विरोधकांवर हल्ला चढविणाऱ्या खा. संजय राऊत आता प्रकृतीच्या कारणास्तव दोन महिने सार्वजनिक कार्यक्रमातून अलिप्त राहणार आहेत. पुढील दोन महिने पूर्णपणे उपचारात व्यस्त राहणार असून कोणालाही भेटू शकणार नाही. नव्या वर्षात नव्या जोमाने भेटू, असे भावनिक आवाहन करून त्यांनी शुक्रवारी आपल्या आजाराबाबत कार्यकर्ते व हितचिंतकांना पत्र लिहून ही माहिती दिली आहे.
स्थानिक स्वराज्य संस्थाच्या निवडणुकीची धामधूम व निवडणूक आयोगाच्या ढिसाळ कारभाराविरोधात विरोधक संघटित होत आहेत, अशावेळी ही मुलुख मैदानी’ तोफ’ काही काळासाठी थंडावणार असल्याने महाविकास आघाडीला मोठा धक्का बसला आहे.
खासदार संजय राऊत दररोज सकाळी पत्रकार परिषद घेऊन सत्ताधाऱ्यांची डोकेदुखी वाढवणारे संजय राऊत यांना आज रुग्णालयात दाखल करण्यात आले. त्यांची तब्येत अचानक बिघडल्याचे त्यांनी सोशल मीडियाच्या माध्यमातून कळविले.
कार्यकर्त्यांना उद्देशून त्यांनी लिहिलेल्या पत्रात म्हटले आहे की, “सर्व मित्र परिवार आणि कार्यकर्त्यांनी माझ्यावर कायम विश्वास ठेवला आणि प्रेम केलं, पण सध्या अचानक माझ्या प्रकृतीत काही गंभीर स्वरुपाचे बिघाड झाल्याचं समोर आले असून उपचार सुरू आहेत, मी यातून लवकरच बाहेर पडेन. वैद्यकीय सल्ल्यानुसार मला बाहेर जाणं व गर्दीत मिसळणं यावर निर्बंध घालण्यात आले आहेत. त्यास नाईलाज आहे. मला खात्री आहे की, मी ठणठणीत बरा होऊन साधारणत: नवीन वर्षात आपल्या भेटीस येईन. आपले प्रेम आणि आशीर्वाद असेच राहू द्या” असे ही म्हटले आहे. त्यामुळे विरोधी पक्षांकडून 1 नोव्हेंबर निवडणूक आयोगावर काढण्यात येणाऱ्या सत्याच्या मोर्चात पण संजय राऊत उपस्थित राहू शकणार नाहीत.
——–
पंतप्रधान मोदींचे ट्वीट : पंतप्रधान नरेंद्र मोदी यांनी राऊतांच्या चांगल्या आरोग्यासाठी सोशल मीडियाच्या माध्यमातून शुभेच्छा दिल्या आहेत. त्यात म्हटले आहे की, “संजय राऊत जी, तुमच्या प्रकृतीत लवकर सुधारणा व्हावी. तुमच्या उत्तम आरोग्यासाठी प्रार्थना करतो”.
