पंढरपूर – श्रीपूर (ता.माळशिरस) येथील कर्मयोगी सुधाकरपंत परिचारक पांडुरंग सहकारी साखर कारखान्यावर बुधवारी सुधाकरपंत परिचारक यांच्या पुर्णाकृती पुतळ्याचे राज्याचे मुख्यमंत्री देवेंद्र फडणवीस यांच्या हस्ते अनावरण तसेच दहा हजार मे.टन विस्तारीकरण गाळप, पोटँश निर्मिती प्रकल्पाचा शुभारंभ देखील करण्यात येणार आहे. यावेळी राज्यमंत्री मंडळातील अनेक दिग्गजांची देखील उपस्थिती राहणार असल्याची माहिती कारखान्याचे चेअरमन तथा माजी आमदार प्रशांत परिचारक यांनी दिली.
या कार्यक्रमा संदर्भात माहिती देताना कारखान्याचे चेअरमन परिचारक यांनी सांगितले की,श्रीपूर येथील कर्मयोगी सुधाकरपंत परिचारक पांडुरंग सहकारी साखर कारखान्यावर बुधवारी (ता.१५) दुपारी अडीच वाजता राज्याचे मुख्यमंत्री देवेंद्र फडणवीस यांच्या उपस्थिती मध्ये कर्मयोगी सुधाकरपंत परिचारक यांचा पुतळा अनावरण कार्यक्रमाचे आयोजन करण्यात आलेले आहे. या कार्यक्रमाच्या अध्यक्षस्थानी राज्याचे जलसंपदा मंत्री राधाकृष्ण विखे पाटील यांची उपस्थिती असणार आहे. या कार्यक्रमास सार्वजनिक बांधकाम मंत्री शिवेंद्रसिंह भोसले, ग्रामविकास मंत्री तथा सोलापूर जिल्ह्याचे पालकमंत्री जयकुमार गोरे, कृषी मंत्री दत्तात्रय भरणे,सहकार मंत्री बाबासाहेब पाटील,महाराष्ट्र राज्य सहकार परिषदेचे अध्यक्ष राजन पाटील तसेच माजी उपमुख्यमंत्री विजयसिंह मोहिते पाटील यांच्या बरोबरच साखर आयुक्त डाँ.संजय कोलते आणि सहकार आयुक्त दिपक तावरे यांची देखील प्रमुख उपस्थिती असणार आहे.
दरम्यान या प्रमुख मंडळींबरोबरच सोलापूर जिल्ह्यातील आजी,माजी खासदार,आमदार तसेच विविध संस्थांचे पदाधिकारी यांची देखील उपस्थिती असणार आहे. या कार्यक्रमास कारखान्याचे सभासद,शेतकरी तसेच पांडुरंग परिवारातील पदाधिकारी, कार्यकर्ते यांनी देखील मोठ्या संख्येने उपस्थित रहावे असे आवाहन देखील कारखान्याचे उपाध्यक्ष कैलास खुळे तसेच कार्यकारी संचालक यशवंत कुलकर्णी यांनी केले आहे.
