अक्कलकोट – दुधनी, गाणगापूर कडे जाणाऱ्या राज्य मार्गावर प्रवास करणे जीवघेणे ठरत आहे. मैंदर्गी ते दुधनी पर्यंतच्या रस्त्याची दयनीय अवस्था झाली असून वाहन चालकातून तसेच नागरिकांतून तीव्र संताप व्यक्त केला जात आहे. सदरचा खराब रस्ता हा लवकरात लवकर नवीन तयार करून वाहनधारकांसह नागरिकांना दिलासा देण्याची मागणी केली जात आहे.
अक्कलकोटच्या दुधनी तसेच कर्नाटकातील तीर्थक्षेत्र गाणगापूर कडे जाणाऱ्या भाविक भक्तांच्या वाहनांची संख्या प्रचंड आहे. तसेच अक्कलकोट ते अफजलपुर कर्नाटकात जाणाऱ्या वाहनांची संख्या प्रचंड मोठी आहे. अक्कलकोट – मैंदर्गी ,दुधनी राज्य मार्ग हा रहदारीचा असून हा मार्ग सध्या धोकादायक बनला आहे. मैंदर्गी ते दुधनी मार्गावर जागोजागी अत्यंत खराब खड्डेमय रस्ते रस्ता बनला आहे. या खराब रस्त्यावरूनच महाराष्ट्रातील भाविकांना गाणगापूर तीर्थक्षेत्री श्री दत्त दर्शनासाठी जावे लागत आहे.
मैंदर्गी ते दुधनी रस्ता हा दयनीय बनला असून वाहन चालकांना मोठी कसरत करत वाहने चालवावी लागत आहेत. प्रचंड धुळीमुळे दुचाकी वाहन चालकाना तर मरण यातना सहन कराव्या लागत आहेत. या मार्गावर खराब रस्त्यामुळे लहान मोठे अपघात होत आहेत. रात्री तर या रस्त्यावरून जीव मुठीत धरून प्रवास करावा लागत आहे. या अगोदर या खराब रस्त्यावर जीवघेणे अपघात झाले आहेत. मैंदर्गी , दुधनी हा राज्यमार्ग असून या रस्त्यावरून दररोज हजारो लहान-मोठी वाहने ये जा करतात.
खराब रस्त्यामुळे वाहन चालकांना तसेच नागरिकांना अबाल वृद्धांना मनस्ताप सहन करावा लागत आहे. संबंधित विभागाने या रस्त्याच्या दयनीय अवस्थेची दखल घेऊन हा रहदारीचा रस्ता दुरुस्त करावा वाहन चालकांची तसेच नागरिकांची होणारी गैरसोय दूर करावी अशी मागणी भाविक भक्तांसह नागरिकांतून केली जात आहे.
