सांगोला – महिलांच्या हातात समाज परिवर्तनाची ताकद आहे. घरच्या घरी सेंद्रिय परसबाग विकसित करून महिलांनी स्वावलंबन, आरोग्य आणि पर्यावरण संरक्षण या तिन्ही गोष्टी साध्य करू शकतात, असे प्रतिपादन सोलापूर जि.प.च्या माजी अध्यक्षा जयमाला गायकवाड यांनी केले. त्या सांगोला तालुक्यातील जवळा ग्रामपंचायतीच्या वतीने महिलांसाठी आयोजित सेंद्रिय परसबाग-आरोग्यदायी जीवनाची सुरुवात या विषयावर कौशल्यविकास प्रशिक्षण कार्यक्रमात बोलत होत्या. कार्यक्रमाच्या अध्यक्षस्थानी अनुराधा गायकवाड होत्या. यावेळी चारुशीला काटकर, उपसरपंच नवाज खलिफा, सुषमा घुले, ग्रामविकास अधिकारी दत्तात्रय रसाळ, ग्रामपंचायत सदस्य, बचत गट सदस्य, ग्रामसंघाच्या महिला पदाधिकारी उपस्थित होत्या.
प्रशिक्षणा दरम्यान कोल्हापूर गार्डन क्लबच्या सदस्या डॉ.प्रमिला बत्ताशी यांनी घरच्या घरी उपलब्ध झाडे, फुले, औषधी वनस्पती व परसबागेत उगवणाऱ्या फुलांचा उपयोग करून नैसर्गिक सरबत, हर्बल ड्रिंक, आरोग्यदायी पेये आणि मसाले तयार करण्याच्या पद्धती महिलांसमोर सादर केल्या. चित्रा देशपांडे यांनी कमी जागेत परसबाग कशी फुलवावी, कुंड्यांमध्ये व टाकाऊ वस्तूंच्या सहाय्याने भाज्या, फळे, फुले कशी लावावीत आणि रासायनिक खते न वापरता सेंद्रिय शेतीची संकल्पना घराघरात कशी रुजवावी यावर मार्गदर्शन केले. रश्मी भूमकर यांनी स्वयंपाकघरातील ओला कचरा, फळभाज्यांच्या साली, देठे व इतर सेंद्रिय अवशेष यांचे योग्य व्यवस्थापन करून त्यापासून उत्कृष्ट प्रतीचे कंपोस्ट खत तयार करण्याच्या पद्धती महिलांना शिकविल्या. कार्यक्रमाचे प्रास्ताविक सरपंच सज्जन माघाडे, सूत्रसंचालन प्रा.शोभा पवार यांनी केले. आभार अर्चना सावंत यांनी मानले.
