सोलापूर – भारतरत्न, विश्वरत्न डॉ. बाबासाहेब आंबेडकर यांच्या महापरिनिर्वाण दिनानिमित्त सोलापूर कृषी उत्पन्न बाजार समितीमधील कांदा बाजारपेठ एक दिवसासाठी बंद ठेवण्यात येणार आहे. त्यामुळे शेतकऱ्यांनी कांदा सोलापूर बाजार समितीमध्ये विक्रीस आणू नये, असे आवाहन बाजार समिती प्रशासनाच्या वतीने करण्यात आले आहे.
दरम्यान, सालाबाद प्रमाणे यंदाच्या वर्षी देखील भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त बाजार समितीमधील अनेक कामगार चैत्यभूमी येथे बाबासाहेबांच्या दर्शनासाठी जात असतात. त्यामुळे बाजार समितीत माथाडी कामगारांची संख्या कमी होते. कमी कामगारांच्या संख्येत कांदा बाजारपेठे व्यापार सुरळीत होणार नाही. ही बाब लक्षात घेता, सोलापूर बाजार समितीमध्ये कार्यरत असणाऱ्या विविध कामगार संघटनांनी दि.६ डिसेंबर महापरिनिर्वाण दिनानिमित्त कांदा बाजार पेठ बंद ठेवण्यासाठी बाजार समिती प्रशासनाकडे निवेदन सादर केले होते. त्यानुसार हा निर्णय घेण्यात आल्याचे सांगण्यात आले.
