सोलापूर – पूर्व भागात दोन वेगवेगळ्या ठिकाणी घडलेल्या तरुणांच्या दुर्दैवी निधनाने संपूर्ण परिसर शोकसागरात बुडाला आहे. बोल्ली मंगल कार्यालय, पोशम्मा मंदिर परिसरातील रहिवासी बालाजी गंगुल तसेच चिप्पा भाजी मंडई शेजारील रहिवासी शशिकांत कोंडा या दोन युवकांच्या अकाली निधनाने त्यांच्या कुटुंबीयांवर दुःखाचा डोंगर कोसळला.
या वेदनादायी प्रसंगातही संबंधित कुटुंबीयांनी माणुसकीचे दर्शन घडवत मरणोत्तर नेत्रदानासाठी संमती दिली. शोकाकुल कुटुंबीयांशी नगरसेवक सत्यनारायण गुर्रम यांनी दूरध्वनीद्वारे संपर्क साधून नेत्रदानाचे महत्त्व समजावून सांगितले. नेत्रदानामुळे अंधारात जगणाऱ्या व्यक्तींच्या आयुष्यात पुन्हा प्रकाश येऊ शकतो, ही उदात्त भावना स्वीकारत कुटुंबीयांनी समाजहिताचा विचार करण्याचे मोठे धैर्य दाखवले.
यानंतर सोलापूर सिव्हिल हॉस्पिटल येथे रीतसर मरणोत्तर नेत्रदानाची प्रक्रिया पूर्ण करण्यात आली.
स्वतःच्या घरात दुःखाचा अंधार असतानाही इतरांच्या आयुष्यात उजेड पेरणाऱ्या या कुटुंबीयांचे सर्वत्र कौतुक होत आहे. अशा घटनांतून खरी माणुसकी, संवेदनशीलता आणि सामाजिक जाणीव अधोरेखित होत असल्याचे मत व्यक्त करण्यात येत आहे.
एक सामाजिक कार्यकर्ता व नगरसेवक म्हणून नगरसेवक सत्यनारायण गुर्रम यांनी दोन्ही कुटुंबांच्या कठीण काळात त्यांना नेत्रदानाचे महत्त्व समजावून सांगण्याचा प्रामाणिक प्रयत्न केला. या कार्यासाठी श्री छत्रपती शिवाजी महाराज सर्वोपचार रुग्णालयाच्या नेत्रपेढी व नेत्रदान समुपदेशक श्री विकास लिंगराज यांचे विशेष सहकार्य लाभले.
यापूर्वी दोन ब्रेनडेड रुग्णांचे अवयवदान तसेच सहा व्यक्तींच्या मरणोत्तर नेत्रदानासाठी कुटुंबीयांशी केलेल्या प्रयत्नांबद्दल शासनाकडून सोलापूर जिल्ह्याचे पालकमंत्री जयकुमार गोरे यांच्या हस्ते नगरसेवक सत्यनारायण गुर्रम यांना विशेष प्रमाणपत्र देऊन सन्मानित करण्यात आले आहे.
