सोलापूर : महानगरपालिकेच्या अतिक्रमण प्रतिबंधक विभागाने आज सलग दुसऱ्या दिवशी बेधडक कारवाई करत विजापूर रोडवरील महात्मा बसवेश्वर शासकीय औद्योगिक प्रशिक्षण संस्था (आयटीआय) संरक्षक भिंती लगतची सर्व अतिक्रमणे हटवली. जेसीबीच्या साह्याने पोलीस बंदोबस्तात येथील तब्बल 50 खोके आणि पत्रा शेडची दुकाने जागेवरच निष्काशित करण्यात आली.
विजापूर रोडवरील आयटीआयच्या संरक्षण भिंती लगत परिसरात अतिक्रमणामुळे वाहतुकीस अडथळा निर्माण होत होता. या कारवाई संदर्भात उपजिल्हाधिकारी, आयटीआय प्रशासनाने पत्र दिले होते. तसेच नागरिकांकडून मिळालेल्या तक्रारींच्या पार्श्वभूमीवर सोलापूर महापालिकेने ही मोहीम हाती घेतली. महापालिका आयुक्त डॉ. सचिन ओम्बासे यांच्या आदेशानुसार नियंत्रण अधिकारी तपन डंके यांच्या मार्गदर्शनाखाली ही कारवाई करण्यात आली.
या ठिकाणी काल गुरुवारी कारवाई करण्यात आली होती. येथील अतिक्रमणधारकांना अतिक्रमण काढून घेण्यासाठी 24 तासाची मुदत कालच दिली होती. या दरम्यान काही जणांनी खोकी वगैरे साहित्य काढून घेतले होते. त्यानंतर पुन्हा सलग दुसऱ्या दिवशी सलग येथे ही मोहीम राबवण्यात आली. आज शुक्रवारी सकाळीच अकरा वाजता सोलापूर महापालिका अतिक्रमण प्रतिबंधक पथक या ठिकाणी दाखल झाले. आयटीआयजवळील संरक्षण भिंतीस लागून असलेले सर्व खोके, लोखंडे छत, पत्रा शेड अशी सुमारे 50 दुकाने निष्काशीत करण्यात आले. कॅन्टीन, चिकन, गॅरेज यासह विविध व्यवसायाची दुकाने काढण्यात आली. हा संपूर्ण परिसर अतिक्रमण मुक्त करण्यात आला. सर्वात मोठी ही कारवाई राबविण्यात आली, असे महापालिका अतिक्रमण प्रतिबंधक विभागाचे अधीक्षक जगन्नाथ बनसोडे यांनी सांगितले.
शहरात वाहतूक सुरळीत ठेवण्यासाठी आणि सार्वजनिक रस्ते मोकळे करण्यासाठी अशा कारवाया पुढेही सातत्याने सुरू राहणार आहे. नागरिकांनी नियमांचे पालन करून रस्त्यावर अडथळा निर्माण होणार नाही, याची दक्षता घ्यावी. नियमांचे उल्लंघन करून पुन्हा अतिक्रमण केल्यास कठोर कारवाई करण्यात येणार असल्याचा इशारा अतिक्रमण प्रतिबंधक विभागाचे अधीक्षक जगन्नाथ बनसोडे यांनी दिला आहे.
तब्बल चार तासानंतर झाली मोहीम फत्ते
विजापूर रोडवरील आयटीआयच्या संरक्षक भिंती लगत असलेली अतिक्रमित सर्व खोकी व इतर पत्रा शेड काढण्याची मोहीम सकाळी 11 ते दुपारी 3 वाजेपर्यंत असे एकूण चार तास राबविण्यात आली. अतिक्रमण प्रतिबंधक विभागाचे अधीक्षक जगन्नाथ बनसोडे हे या ठिकाणी तळ ठोकून उपस्थित होते. तब्बल चार तासानंतर ही मोहीम फत्ते करण्यात आली. या कारवाईमुळे विजापूर रोडवरील वाहतूक सुरळीत झाली असून पादचाऱ्यांना दिलासा मिळाला आहे. नागरिकांनी महापालिकेच्या या कारवाईचे स्वागत केले.
कारवाईवेळी अशी होती यंत्रणा तैनात
या ठिकाणी कारवाईदरम्यान 2 जेसीबी, डंपर यासह मंडई, अतिक्रमण प्रतिबंधक विभागाचे कर्मचारी तैनात होते. त्याचबरोबर पोलीस आणि बीट मार्शल असा बंदोबस्त होता. सतत कारवाई झाल्याने एका जेसीबीचा पाईप तुटला. यामुळे दुसरा जेसीबी मागवावा लागला, अशी माहिती अतिक्रमण प्रतिबंधक विभागाचे अधिक्षक जगन्नाथ बनसोडे यांनी दिली.
