गर्दीच्या ठिकाणी मतदार जनजागृती

जिंतूर / परभणी – 29 नोव्हेंबर रोजी जिंतूर नगर परिषद क्षेत्रातील गर्दीच्या ठिकाणी स्वीप पथकाच्या माध्यमातून मतदार जनजागृती करण्यात आली.

असूद्या कितीही काम धाम, मतदान करणे पहिले काम …..
मतदार राजा जागा हो लोकशाहीचा धागा हो …..
शंभर टक्के मतदान लोकशाही होईल बलवान….
अशा घोषणा देण्यात आल्या. स्वीप पथकातील सदस्य आणि साहित्यिक मयूर जोशी यांनी
(ताई, माई, बाई, अक्का जागे व्हा रे सारे जण
दादा, भाऊ, मामा, काका करा करा मतदान….)
या आशयगर्भ स्वरचित कवितेच्या माध्यमातून मतदार जनजागृती करण्याचा प्रयत्न केला. “जन हो करा तुम्ही मतदान…..” या गीताचे गायन केले.

स्वीप पथकातील सदस्य राजेंद्र ढाकणे यांनी मतदारांना मतदान करण्या बाबतची प्रतिज्ञा घेतली.
निवडणूक आयोग यांच्या निर्देशानुसार जिल्हाधिकारी तथा निवडणूक निर्णय अधिकारी संजयसिंह चव्हाण, उपविभागीय अधिकारी सेलू तथा निवडणूक निर्णय अधिकारी जिंतूर नगर परिषद शैलेश लाहोटी, तहसीलदार जिंतूर सहाय्यक निवडणूक निर्णय अधिकारी राजेश सरवदे, मुख्याधिकारी उमेश ढाकणे, उपमुख्याधिकारी अनिल समिंद्रे, नायब तहसीलदार निवडणूक सुग्रीव मुंढे, मिडिया पथक प्रमुख नायब तहसीलदार प्रशांत राखे, गटशिक्षणाधिकारी तथा मतदान जनजागृती पथक प्रमुख त्र्यंबक पोले यांच्या नियोजनानुसार मतदार जनजागृती कार्यक्रम सुरू करण्यात आला आहे.

मतदार जनजागृती अभियान यासाठी भोंगा व जनजागृती बॅनर असलेले फिरते वाहन तयार करण्यात आले आहे. या वाहनाच्या माध्यमातून जिंतूर नगर परिषदेच्या विविध भागांमध्ये मतदार जनजागृती पथकाद्वारे जनजागृती केली जात आहे. मतदारांनी आपल्या मतदानाचा हक्क बजावावा या संदर्भात प्रबोधन केले जात आहे.

त्याप्रमाणे जिंतूर नगरपरिषद क्षेत्रातील सर्व मतदारांनी उत्सव लोकशाहीचा, अभिमान देशाचा अशी भावना मनात ठेवून दिनांक 02/12/2025 रोजी सकाळी 07:30 ते संध्याकाळी 05:30 या वेळेत मतदान केंद्रावर जाऊन मतदान करावे अशा प्रकारचे प्रबोधन तालुकास्तरीय मतदार जनजागृती व सहभाग कार्यक्रमाचे पथक सदस्य राजेंद्र ढाकणे, दिनकर घुगे, मारोती घुगे, पांडुरंग भांबळे, प्रवीण घुले, लक्ष्मण टाकणसार, हनुमान गायकवाड, योगेश देशमुख यांनी केले.