जिंतूर / परभणी – तालुक्यातील बोर्डी गावात मुख्यमंत्री समृद्ध पंचायतराज अभियानांतर्गत ग्रामविकासाला चालना देण्यासाठी आज एक महत्त्वपूर्ण उपक्रम राबविण्यात आला. ग्रामीण भागात पाणीसाठा वाढवणे, जलस्त्रोतांची उपलब्धता सुधारणा तसेच शेतीसाठी स्थिर जलव्यवस्था निर्माण करणे या उद्दिष्टांसाठी गावकऱ्यांनी स्वयंप्रेरणेने पुढाकार घेत वनराई बंधारा बांधण्याचे कार्य श्रमदानातून पूर्ण केले.
पंचायत समिती जिंतूरचे गटविक ास अधिकारी सुभाष मानकर यांच्या मार्गदर्शनाखाली हा उपक्रम राबविण्यात आला. मानकर यांनी प्रत्यक्ष कामाची पाहणी करून गावकऱ्यांना प्रोत्साहन देत योजनेंतर्गत उपलब्ध सुविधा व आवश्यक मार्गदर्शन पुरविले. या कामात गावातील महिला बचत गटांच्या सदस्यांनी विशेष उत्साहाने सहभाग घेतला.
पाणी, माती वाहून नेणे, बंधाऱ्याची भिंत घट्ट करणे, पसरट माती समतल करणे यांसाठी महिलांनी मोठ्या संख्येने योगदान दिले. त्यांच्या सहभागामुळे काम अपेक्षेपेक्षा अधिक वेगाने पूर्ण झाले.
वनराई बंधाऱ्याचे लाभ गावातील हा बंधारा पुढील काळात पावसाळ्यातील पाणीसाठा वाढवेल, परिसरातील भूजलस्तर उंचावेल, विहिरी, बोअरवेल यांना पाणीटंचाई कमी होईल, रब्बी हंगामातील शेतीला पाण्याचा आधार मिळेल. गट-विकास अधिकारी मानकर यांनी सांगितले की, ‘सरकारच्या विविध जलसंधारण योजनेसोबत गावकऱ्यांचा सहभाग असेल तर पाण्याची समस्या मोठ्या प्रमाणात कमी होईल.’
ग्रामस्थांनी बंधाऱ्याच्या बांधकामावेळी पुढील काही आठवड्यांत आणखी काही लहान-मोठे जलसंधारण प्रकल्प हाती घेण्याचा निर्णय घेतला आहे. ग्रामपंचायत स्तरावर विशेष समितीही गठीत करण्यात आली आहे. बोर्डी गावातील हा उपक्रम जिंतूर तालुक्यातील इतर ग्रामपंचायतींसाठी प्रेरणादायी ठरत असून, ग्रामीण भागात जलसंधारणाबाबत लोकजागृती वाढीस लागल्याचे प्रशासनाने नमूद केले आहे.
