पश्चिम बंगालची राजधानी कोलकात्यात एका तरुणीनं तिच्या लिव्ह इन पार्टनरची हत्या केली. त्यानंतर खुनाची माहिती पोलिसांना फोन करुन दिली. पोलिसांनी घटनास्थळ गाठून महिलेला अटक केली. या घटनेमुळे परिसरात तणाव पसरला आहे. विशेष म्हणजे या हत्येपूर्वी तरुणानं त्याच्या पार्टनर आणि तिच्या लेकासोबतचा फोटो शेअर केला होता. त्याला फॅमिली असं कॅप्शन दिलं होतं.
डमडम परिसरातील मधुगर भागात राहणाऱ्या महिलेनं पोलिसांना कॉल केला होता. तिनं पोलिसांना तिच्या फ्लॅटवर येण्यास सांगितलं. पोलिसांचं पथक पोहोचलं त्यावेळी त्यांना एक तरुण रक्ताच्या थारोळ्यात पडलेला दिसला. त्याच्या शरीरावर चाकूच्या हल्ल्याच्या खुणा होत्या. पोलिसांनी त्याला कमरहाटीतील सगोर दत्ता रुग्णालयात नेलं. तिथल्या डॉक्टरांनी तरुणाला मृत घोषित केलं. यानंतर तरुणाचा मृतदेह शवविच्छेदनासाठी पाठवण्यात आला. नागेरबाजार पोलीस ठाण्यात आरोपी महिलेविरोधात हत्येचा गुन्हा नोंदवण्यात आला आहे.
पेशानं फोटोग्राफर असेलला सार्थक दास नावाचा तरुण मधुगढ परिसरात एका फ्लॅटमध्ये संहती पॉल नावाच्या तरुणीसोबत लिव्ह इन रिलेशनशीपमध्ये राहायचा. संहती प्रोफेशनल मेकअप आर्टिस्ट आहे. गेल्या काही दिवसांपासून त्यांच्यात सतत वाद व्हायचे. बुधवारी सकाळी संहतीनं सार्थकवर धारदार चाकूनं हल्ला केला. त्याच्यावर अनेक वार केले. यानंतर तिनं पोलिसांना फोन करुन घडला प्रकार सांगितला. चौकशीत तिनं गुन्ह्याची कबुली दिली. यानंतर पोलिसांनी तिला अटक केली.
सार्थकच्या हत्येमागचं नेमकं कारण अद्याप तरी स्पष्ट झालेलं नाही. पोलिसांकडून या प्रकरणाचा तपास सुरू आहे. पोलिसांनी संहतीविरोधात विविध कलमांखाली गुन्हे दाखल केले आहेत. २० आणि २२ फेब्रुवारीला सार्थकनं त्याचे डीपी बदलले होते. त्यात त्यानं संहतीचा उल्लेख माझी लाईफलाईन असा केला होता. सोबत लववाले इमोजी लावले होते. पण संहतीच्या टाईमलाईनवर सार्थकचा एकही फोटो नाही.
