विशाखापट्टणम: शहर पोलिसांनी नव्या कोऱ्या वॉशिंग मशीनमधून १.३ कोटी रुपये जप्त केले आहेत. एका प्रसिद्ध इलेक्ट्रॉनिक शोरुमच्या व्यवस्थापनाकडून ही रक्कम पाठवली जात होती. ही रक्कम हवालाचा भाग असल्यानं पोलिसांनी कारवाई केली. एका मिनी व्हॅनमधून इलेक्ट्रॉनिक उपकरणं नेली जात होती. त्यात सहा टॉप लोड वॉशिंग मशीन आणि ३० मोबाईल होते. यासोबतच व्हॅनसोबत एक दुचाकीदेखील होती. पोलिसांनी या सगळ्या वस्तू जप्त केल्या आहेत. या प्रकरणात पोलिसांनी चालक नागीरेड्डी देवुल्लू, त्याचा सहायक येरा मनीक्याम आणि सुपरवायझर सुरीसेट्टी साई कुमारला अटक केली आहे.
वॉशिंग मशीनमध्ये रोकड भरण्यात आली होती. त्या व्यवस्थित पॅक करण्यात आल्या होत्या. पोलिसांना संशय आल्यानं त्यांनी तपासणी केली. तेव्हा आतमध्ये रोकड सापडली. याची माहिती तातडीनं जीएसटी, प्राप्तिकर विभाग आणि सक्तवसुली संचलनालयाला देण्यात आली. व्हॅनमध्ये तब्बल १.३ कोटींची रोकड सापडली. याबद्दल आपल्याला कोणतीच माहिती नसल्याचा दावा चालक नागीरेड्डी दुवेल्लूनं केला. व्हॅनसोबत एक जण दुचाकीवरुन प्रवास करत होता. व्हॅन आणि दुचाकी दोंडापार्थीमधील शोरुममधून विजयवाडा येथील मुख्यालयात जात होत्या.
खबऱ्यांकडून मिळालेल्या खात्रीशीर माहितीच्या आधारे एअरपोर्ट झोन पोलिसांनी विजयवाडाच्या दिशेनं निघालेली व्हॅन रोखली. तेव्हा त्यांना वॉशिंग मशीनमध्ये रोकड सापडली. ही रक्कम ५०० रुपयांच्या नोटांच्या स्वरुपात होती. मशीनमध्ये असलेल्या नोटांची आपल्याला कोणतीही कल्पना नसल्याचं अटक केलेल्या तिघांनी पोलिसांना सांगितलं. आम्ही केवळ कंपनीच्या शाखेतून विजयवाडातील मुख्यालयात वॉशिंग मशीन घेऊन जात होतो, असा दावा तिघांनी केला.
व्हॅनचा चालक, त्याच्यासोबत असलेल्या सहायकाकडे कोणत्याही प्रकारचं बिल किंवा पावती नव्हती. त्यामुळे पोलिसांना संशय आला. त्यांनी तपासणी केली असता वॉशिंग मशीनमध्ये रोकड सापडली. व्हॅन रात्री उशिरा विजयवाडाच्या दिशेनं निघाली होती. तिच्यासोबत एक दुचाकी होती. हा दुचाकीस्वार सुरक्षेसाठी होता. यामुळे संशय आणखी वाढला. पोलिसांनी रोकड जप्त करुन ती न्यायालयात जमा केली आहे.
