मध्य प्रदेश विधानसभा निवडणुकांसाठी भाजपने जाहीर केलेल्या चौथ्या यादीत सिहोर मतदारसंघातून आमदार सुदेश राय यांना उमेदवारी जाहीर झाली होती
मध्य प्रदेशातील सिहोरमध्ये भाजप नेते शमा पठाण यांचे आकस्मिक निधन झाले. ते अल्पसंख्याक मोर्चाचे नगर मंडळ अध्यक्ष होते. सोमवारी सायंकाळी सिहोर विधानसभा मतदारसंघातून सुदेश राय यांना भाजपकडून तिकीट मिळाल्याचा आनंद ते साजरा करत होते. यावेळी त्यांनी कार्यकर्त्यांसह फटाकेही फोडले. यानंतर शमा पठाण आणखी फटाके आणण्यासाठी बाहेर पडले असता, अचानक त्यांची प्रकृती खालावली आणि त्यांची प्राणज्योत मालवली. शमा पठाण यांच्या निधनामुळे जल्लोषाचे वातावरण शोकांतिकेत पालटले.
भारतीय जनता पक्षाने मध्य प्रदेश विधानसभा निवडणुकांसाठी सोमवारी सायंकाळी जाहीर केलेल्या चौथ्या यादीत सिहोर मतदारसंघातून आमदार सुदेश राय यांना उमेदवारी जाहीर झाली. यानंतर मतदारसंघातील कार्यकर्त्यांनी जल्लोष केला. यामध्ये भाजप अल्पसंख्याक मोर्चाचे नगर मंडळ अध्यक्ष शमा पठाणही सहभागी झाले होते. शमा पठाण यांनी परिसरात फटाके फोडले. कार्यकर्त्यांसह बॉम्बही लावले. फटाके संपल्यानंतर ते आणखी साहित्य घेण्यासाठी जवळच पिपळ्या मीरा येथे गेले असता, अचानक त्यांची प्रकृती खालावली. वाटेतच त्यांचा दुर्दैवी मृत्यू झाला.
सिहोर जिल्ह्यात भाजपने सिहोरमधून आमदार सुदेश राय, इछावरमधून आमदार करण सिंग वर्मा आणि बुधनीमधून मुख्यमंत्री शिवराज सिंह चौहान यांना उमेदवारी दिली आहे. भाजप कार्यकर्ते आणि समर्थकांमध्ये प्रचंड उत्साह दिसून आला. मात्र अल्पसंख्याक मोर्चाच्या नेत्याच्या निधनामुळे पक्ष कार्यालयात दुःखाचे वातावरण पसरले आहे. ‘आज तक’ने यासंदर्भात वृत्त दिले आहे.
निवडणूक आयोगाने मध्य प्रदेशसह पाच राज्यांच्या विधानसभा निवडणुकांचा कार्यक्रम जाहीर केला. त्यानुसार, मध्य प्रदेशच्या २३० जागांसाठी १७ नोव्हेंबरला एकाच टप्प्यात मतदान होणार आहे, तर मतमोजणी तीन डिसेंबरला होणार आहे. सत्ताधारी भाजपने आतापर्यंत १३६ जागांसाठी उमेदवार जाहीर केले आहेत. यापूर्वी भाजपने ७९ उमेदवारांची घोषणा केली होती, ज्यात प्रत्येकी ३९ उमेदवारांच्या दोन याद्या आणि एका उमेदवाराची तिसरी यादी समाविष्ट आहे.
