साऊथचे सुपरस्टार रजनीकांत यांचा ‘जेलर’ हा चित्रपट बॉक्स ऑफिसवर धमाका करत आहे. त्याने २० दिवसांत सुमारे ३२२ कोटींची कमाई केली आहे. प्रत्येकजण चित्रपटाच्या यशाचा आनंद साजरा करत असताना त्यावर वादाचे डोंगर घोंगावत आहेत. या चित्रपटातील एका दृश्यावरुन बराच गदारोळ झाला आहे. त्यात एक कॉन्टॅक्ट किलर आहे, ज्याने रॉयल चॅलेंजर्स बॅंगलोर म्हणजेच आरसीबीची जर्सी घातली आहे. आता हे पाहून लोकांच्या भावना इतक्या दुखावल्या की त्यांनी दिल्ली उच्च न्यायालयात धाव घेतली. यावर आता निर्णय आला आहे. हायकोर्टाने काय म्हटलंय ते पाहूया.
‘जेलर’ चित्रपटात आरसीबीची जर्सी कॉन्ट्रॅक्ट किलरने घातली आहे. त्यावरुनच लोकांनी हायकोर्टात तक्रार केली. तेथे झालेल्या सुनावणीदरम्यान निर्मात्यांना १ सप्टेंबरपर्यंत चित्रपटातून ते दृश्य हटवण्याचे आदेश देण्यात आले आहेत. रॉयल चॅलेंजर्स स्पोर्ट्स प्रायव्हेट लिमिटेडच्या वतीने हा खटला दाखल करण्यात आल्याची माहिती न्यायालयाला देण्यात आली. यामध्ये दोन्ही पक्षांची बैठक होऊन तोडगा निघाला. १ सप्टेंबरनंतर हा सीन कोणत्याही थिएटरमध्ये दाखवला जाणार नाही, याची काळजी घेण्याचे आदेशही न्यायालयाने निर्मात्यांना दिले आहेत.
जेलर’ विरोधात कोर्टात धाव
उच्च न्यायालयाने असेही म्हटले आहे की जेव्हा हा चित्रपट ओटीटी प्लॅटफॉर्म आणि टेलिव्हिजनवर प्रसारित केला जाईल तेव्हा तो संपूर्ण बदलांसह दाखवला जावा. त्यात आरसीबीचा सीन नसावा. मीडिया रिपोर्ट्सनुसार, जेव्हा रॉयल चॅलेंजर्स स्पोर्ट्स प्रायव्हेट लिमिटेडला चित्रपटातील दृश्याबद्दल कळले की कॉन्टॅक्ट किलर आपलीच जर्सी घालून महिलेशी असभ्य भाषा बोलत आहे, तेव्हा त्यांनी न्यायालयात धाव घेतली आणि ब्रँडची प्रतिमा खराब केल्याचा आरोप केला.
रजनीकांतच्या ‘जेलर’ चित्रपटातील कलाकार
‘जेलर’ हा तमिळ भाषेतील अॅक्शन-कॉमेडी चित्रपट आहे. याचे दिग्दर्शन नेल्सन दिलीपकुमार यांनी केले असून कलानिती मारन यांनी निर्मिती केली आहे. यामध्ये रजनीकांत मुख्य भूमिकेत आहे. त्यांच्याशिवाय विनायकन, रम्या कृष्णन, वसंत रवी, सुनील, योगी बाबू यांच्यासह इतर कलाकार आहेत. या चित्रपटाची कथा एका निवृत्त जेलरभोवती फिरते ज्याला मूर्ती तस्करी करणाऱ्याला पकडायचे असते. १० ऑगस्टला हा सिनेमा रिलीज झाला होता.
