शेतात काम करणाऱ्या महिलेला वाघाने हल्ला करुन ठार केल्याच्या घटनेनंतर मानव-वन्यजीव संघर्ष टाळण्यासाठी ताडोबा बफर प्रशासनाने झपाट्याने पावले उचलली आहे. वाघांच्या हालचाली टिपण्यासाठी विशेष व्याघ्र संरक्षण दलाची २५ सदस्यीय पीआरटी चमू तैनात केली. परिसरात २० कॅमेरे बसविले आहेत. मोहर्ली परिसरातील शेतकऱ्यांना सुरक्षेसाठी मानवी मुखवट्यांचे वाटप केले.
ताडोबा-अंधारी व्याघ्र प्रकल्पाच्या मोहर्ली वनपरिक्षेत्रातील मुधोली नियतक्षेत्रात शेतात काम करताना वाघाच्या हल्ल्यात शुक्रवारी भद्रावती तालुक्यातील टेकाडी येथील लक्ष्मी रामराव कन्नाके (वय ६०) ही महिला ठार झाली. या घटनेनंतर परिसरात दहशत होती. परिसरात गस्त वाढविण्यात आली आहे. त्यानंतर वनविभागाने वाघांच्या हालचाली टिपण्यासाठी विशेष व्याघ्र संरक्षण दलाची २५ सदस्यीय पीआरटी चमू तैनात केली आहे. तसेच परिसरात २० ट्रॅप कॅमेरे बसविले आहेत. यासोबतच गावागावांत जनजागृती करीत बोर्ड आणि बॅनर लावण्यात आले.
वन्य प्राण्यांपासून सावधगिरीबाबत ऑडीओ क्लिप तयार करून ध्वनिक्षेपकाद्वारे जनजागृती करण्यात येत आहे. अशा घटना भविष्यात घडू नये म्हणून राष्ट्रीय व्याघ्र संवर्धन यंत्रणेच्या मार्गदर्शक सूचनांनुसार समिती गठित केली आहे. समितीने केलेल्या उपाययोजना अवलंबिल्या जात आहेत. या उपक्रमातून मानव-वन्यजीव संघर्ष टाळण्यास मदत होईल, असा विश्वास मोहर्ली वनपरिक्षेत्राधिकारी संतोष थिपे यांनी व्यक्त केला आहे. दरम्यान, ताडोबा अंधारी व्याघ्र प्रकल्प बफरचे उपसंचालक कुशाग्र पाठक यांनी पुढाकार घेऊन मृतकांच्या वारसांना मदत मिळवून दिली.
शेतकऱ्यांना मुखवट्यांचे वाटप
शेतात काम करताना अनेकदा वन्यप्राण्यांच्या हल्ल्यात शेतकऱ्यांचा मृत्यू झाल्याच्या घटना अनेक ठिकाणी घडल्या आहेत. यावर मोहर्ली प्रशासनाने यापूर्वीच अनोखी शक्कल लढवली आहे. शेतात काम करणाऱ्या शेतकऱ्यांना मानवी मुखवट्यांचे वितरण केले आहे. शेतकरी हा मुखवटा आपल्या डोक्याच्या मागे लावणार आहेत. परिणामी वन्य प्राणी त्यांच्याजवळ फिरकणार नाहीत. त्यांचे संरक्षण होईल.
