मंगळवेढा – नगरपरिषदेसाठी अत्यंत चुरशीच्या झालेल्या मतदानामध्ये 69.77 टक्के इतके मतदान झाले असून सर्वाधिक मतदान महिलांचे 14 हजार 385 म्हणजेच पुरुषापेक्षा 134 महिला मतदारांनी अधिक मतदान केल्याचे स्पष्ट झाले आहे. दरम्यान कुठेही अनुचीत प्रकार न घडता शांततेत मतदान प्रतिक्रीया पार पडली.
मंगळवेढा नगर परिषदेच्या पंचवार्षिक निवडणूकीसाठी शनिवारी दि.20 रोजी सकाळी 7.30 ते सायंकाळी 5.30 अत्यंत चुरशीने मतदान झाले. सकाळी थंडीचे प्रमाण अधिक असल्यामुळे यावेळी मतदान केंद्रावर तुरळक गर्दी होती. सुर्याचा पारा जसजसा वाढत गेला त्या प्रमाणे मतदान केंद्रावर मतदान करण्यासाठी लांबलचक रांगा लागल्याचे चित्र होते. शहरामध्ये सर्वाधिक मतदानाची टक्केवारी प्रभाग क्रमांक 6 मध्ये 79.67 टक्के इतके नोंदविले गेले आहे. तर प्रभाग क्रमांक 5 मध्ये सर्वाधिक कमी म्हणजे 62.84 टक्के मतदान झाल्याचे नोंदविले गेले आहे. स्थानिक स्वराज्य संस्थेची निवडणूक असल्यामुळे मतदाना करण्यामध्ये अधिक चुरस दिसून येत होती. शहरामध्ये 28 हजार 638 एकूण मतदार असून निवडणूकीसाठी 19 हजार 981 इतक्या मतदारांनी आपला मतदानाचा पवित्र हक्क बजावला आहे. मतदान केंद्रावर मतदानाचा पवित्र हक्क बजावण्यासाठी अपंग,वृध्द आदी मतदारांनीही हजेरी लावली होती. दरम्यान एका मतदान केंद्रावर अपंगांना बसून जाण्यासाठीची व्हीलचेअर तुटल्यामुळे अपंग मतदारांना त्याचा त्रास सहन करावा लागला. मतदान शांततेत होणेकामी डी.वाय.एस.पी. डॉ.बसवराज शिवपुजे,पोलीस निरीक्षक दत्तात्रय बोरीगिड्डे,गोपनीय विभागाचे पोलीस हवालदार दिगंबर गेजगे आदी सर्वजण मतदान केंद्रावर बारकाईने लक्ष ठेवून होते. मतदारांना मोठ्या प्रमाणात लक्ष्मीदर्शन निवडणूकीत दिल्याचा थेट आरोप माजी पालकमंत्र्यांनी प्रसार माध्यमाजवळ केल्याने मंगळवेढा तालुकयात चर्चेला उधाण आले आहे. इंग्लिश स्कूल प्रशालेत आदर्श मतदान केंद्र उभे करण्यात आले होते. ते फुग्याने सुशोभित केल्याने सर्व मतदारांचे लक्ष खेचून घेत असल्याचे चित्र होते.
नगरपरिषद निवडणूकीसाठी मतदारांनी मतदान करण्यासाठी लांबलचक रांगा लावल्याचे छायाचित्रात दिसत आहे. (छाया-प्रथमेश राजे नागणे,मंगळवेढा)
